విదేశీ విద్య ఉపకార వేతన బకాయిలు రూ.303 కోట్లు విడుదల..

ఆర్థికశాఖకు ఉప ముఖ్యమంత్రి భట్టి ఆదేశాలు

ఈనాడు, హైదరాబాద్‌: విదేశీవిద్య ఉపకార వేతనాల పద్దు కింద పెండింగ్‌ బకాయిలు రూ.303 కోట్లు తక్షణం విడుదల చేయాలని ఆర్థికశాఖ అధికారులను ఉప ముఖ్యమంత్రి భట్టి విక్రమార్క ఆదేశించారు. 2022 నుంచి పెండింగ్‌లో ఉన్న ఈ బకాయిలన్నీ ఒకేసారి విడుదల చేయాలని సూచించారు. బుధవారం ప్రజాభవన్‌లో ఆయన ఆర్థికశాఖ అధికారులతో సమీక్ష నిర్వహించారు. మొత్తం 2,288 మంది విద్యార్థులకు విదేశీ విద్య ఉపకార వేతన బకాయిలు చెల్లించాల్సి ఉందని అధికారులు ఆయనకు వివరించారు. భట్టి మాట్లాడుతూ గత ప్రభుత్వ కాలం నుంచి ఈ ఉపకార వేతనాలకు నిధులు విడుదల కాకపోవడంతో విదేశాల్లో ఉన్న విద్యార్థులు, రాష్ట్రంలో ఉన్న వారి తల్లిదండ్రులు మానసికంగా ఇబ్బంది పడుతున్నారన్నారు. ఓవైపు ఉపకార వేతనాలు అందక.. మరోవైపు అమెరికా, యూకే వంటి దేశాల్లో అక్కడి కొత్త ఆంక్షలతో విద్యార్థులపై మానసిక ఒత్తిడి తీవ్రమైందని.. ఆయా దేశాల్లో గతంలో మాదిరిగా చదువుకుంటూ ఉద్యోగాలు చేసుకునే పరిస్థితి లేదని, అక్కడున్నవారిపై రోజురోజుకూ ఆర్థిక భారం పెరిగిపోతుందని వివరించారు. మరోవైపు బ్యాంకుల్లో తీసుకున్న విద్యారుణ భారం పెరుగుతున్నందున ఈ సమస్యను ప్రాధాన్య అంశంగా భావించి బకాయిలన్నీ ఒకేసారి విడుదల చేయాలని ఆర్థికశాఖ అధికారులను ఆదేశించారు.