ఘనంగా మేడారం చిన్నజాతర ప్రారంభం

ఈనాడు డిజిటల్‌, జయశంకర్‌ భూపాలపల్లి, తాడ్వాయి, న్యూస్‌టుడే: ములుగు జిల్లా తాడ్వాయి మండలం మేడారంలో వనదేవతల మండమెలిగె పండగ (చిన్న జాతర) బుధవారం ఘనంగా ఆరంభమైంది. ఉదయాన్నే మేడారంలోని సమ్మక్క పూజా మందిరాన్ని, కన్నెపల్లిలోని సారలమ్మ గుడిని పూజారులు శుద్ధి చేశారు. పూజా కార్యక్రమాలు నిర్వహించారు. రాత్రి మేడారం, కన్నెపల్లి నుంచి అమ్మవార్ల అడేరాలు, ఇతర పూజా సామగ్రితో డోలు వాయిద్యాల మధ్య నృత్యాలు చేసుకుంటూ గద్దెల ప్రాంగణానికి చేరుకుని పూజలు నిర్వహించారు. గురువారం ఉదయం అమ్మవార్ల అడేరాలను తిరిగి ఆయా ఆలయాలకు చేర్చుతారు. శనివారం వరకు జాతర కొనసాగనుంది. జాతర తొలిరోజు వివిధ ప్రాంతాలు, పొరుగు రాష్ట్రాల నుంచి భక్తులు తరలివచ్చారు. మంత్రి సత్యవతి రాథోడ్‌, ములుగు కలెక్టర్‌ కృష్ణ ఆదిత్య, ఎస్పీ గౌస్‌ ఆలం, జడ్పీ ఛైర్మన్‌ జగదీశ్వర్‌ తదితరులు అమ్మవార్లను దర్శించుకున్నారు.