నేడు మన ‘నీడ’ మనకు కనిపించదు!

ఈనాడు, హైదరాబాద్‌: మనం ఎండలో ఎక్కడికి వెళ్లినా.. కూర్చున్నా.. నిల్చున్నా.. మన నీడ వెన్నంటే ఉంటుంది కదా.. గురువారం మిట్టమధ్యాహ్న సమయంలో మాత్రం అలా ఉండదు. మన నీడ ‘మాయం’ అవుతుంది! ఇలా ఏడాదికి రెండుసార్లు జరుగుతుంది. ఈ ‘శూన్య నీడ’ రోజు సూర్యుడు సరిగ్గా నడినెత్తిపై ఉంటే.. నిటారుగా ఉండే మనిషి, జంతువు లేదా వస్తువు నీడ కనిపించదు. హైదరాబాద్‌లో ఈ శూన్యనీడ దినం గురువారం మధ్యాహ్నం 12.12 గంటలకు ప్రారంభమై.. రెండు, మూడు నిమిషాల వరకూ కొనసాగుతుంది’’ అని హైదరాబాద్‌లోని బి.ఎం.బిర్లా నక్షత్రశాల ప్రతినిధులు బుధవారం తెలిపారు. మేఘాలు కమ్ముకుని వర్షం కురిస్తే మాత్రం శూన్యనీడ కనిపించే అవకాశం ఉండదన్నారు. ఔత్సాహికులు తమ ఫొటోలను birlasc@gmail.com కు పంపించాలని సూచించారు. కాగా, ‘శూన్య నీడ’ను రెండు, మూడు రోజులపాటు.. సరిగ్గా మధ్యాహ్నం 12 గంటలకు చూడొచ్చని ప్లానెటరీ అసోసియేషన్‌ ఆఫ్‌ ఇండియా హైదరాబాద్‌ అధ్యక్షుడు రఘునందన్‌ తెలిపారు. హైదరాబాద్‌లోని సుందరయ్య విజ్ఞాన కేంద్రం వద్ద బుధవారం శూన్య నీడ ఎలా మారుతుందో విద్యార్థులకు ప్రయోగాత్మకంగా వివరించామని పేర్కొన్నారు.