DAC: అమెరికన్‌ సాయుధ డ్రోన్ల కొనుగోలుకు రక్షణ శాఖ పచ్చజెండా..!

దిల్లీ: అమెరికా (America) నుంచి సాయుధ డ్రోన్ల (MQ-9B Predator Drones) కొనుగోలుకు మార్గం సుగమమైంది. రక్షణ శాఖ మంత్రి రాజ్‌నాథ్‌ సింగ్‌ (Rajnath Singh) అధ్యక్షతన గురువారం సమావేశమైన డిఫెన్స్‌ అక్వైజిషన్‌ కౌన్సిల్‌ (DAC) ఈ ఒప్పందానికి పచ్చజెండా ఊపింది. ఇప్పుడు ఈ ప్రతిపాదనకు భద్రతా కేబినెట్ కమిటీ (CCS) ఆమోదముద్ర వేయాల్సి ఉందని ఓ అధికారి వెల్లడించారు. భారత ప్రధాని నరేంద్ర మోదీ (Narendra Modi) అమెరికా పర్యటన వేళ డీఏసీ ఈ మేరకు నిర్ణయం తీసుకుంది. 30 డ్రోన్లతో కూడిన ఈ కొనుగోలు ఒప్పందం విలువ దాదాపు 3 బిలియన్‌ డాలర్లు. త్రివిధ దళాల్లో వీటిని ప్రవేశపెట్టనున్నారు. 

సరిహద్దులు, సాగరజలాల్లో నిఘా, శత్రు జలాంతర్గాముల వేట, సుదూర ప్రాంతాల్లోని లక్ష్యాలపై కచ్చితత్వంతో దాడి వంటి అవసరాలకు ఈ డ్రోన్లను ఉపయోగించే వీలుంది. చాలాకాలంగా అమెరికా నుంచి వీటిని కొనుగోలు చేసేందుకు భారత్‌ ఆసక్తి చూపుతోంది. అయితే, కొన్ని ఇబ్బందులతో ఈ ఒప్పందం ముందుకు వెళ్లడంలేదు. ఎట్టకేలకు డీఏసీ దీనికి ఆమోదం తెలిపింది. అమెరికాలో మోదీ- బైడెన్‌ల చర్చల అనంతరం దీన్ని ప్రకటించే అవకాశం ఉంది. ఇదిలా ఉండగా.. భారత్‌ ప్రస్తుతం రెండు అమెరికన్‌ ‘ఎమ్‌క్యూ-9బీ సీ గార్డియన్‌’ డ్రోన్లను లీజుకు తీసుకుని నడిపిస్తోంది. అవి హిందూ మహాసముద్ర ప్రాంతంలో నిఘానేత్రంగా పనిచేస్తున్నాయి.