Doctor: రోగి కాలేయాలపై పేర్లు చెక్కిన వైనం.. వైద్యుడిపై జీవితకాల నిషేధం

లండన్‌: అత్యంత గౌరవప్రదమైన స్థానంలో ఉన్న ఓ వైద్యుడు.. తన వృత్తికే తలవంపులు తెచ్చే పని చేశాడు. ఓ రోగికి రెండుసార్లు కాలేయ మార్పిడి చేసిన యూకేకు చెందిన డాక్టర్‌​ సైమన్​ బ్రామ్​హాల్ తన పేరులోని మొదటి అక్షరాలతో కాలేయాలపై సంతకంలా చేశాడు. దీనిపై తాజాగా విచారణ జరపగా.. మెడికల్​ ప్రాక్టీషనర్స్​ ట్రైబ్యునల్​ సర్వీస్​ (ఎంపీటీఎస్).. నిందితుడి​ పేరును  మెడికల్​ రిజిస్టర్​ నుంచి తొలగించింది. వైద్య వృత్తి నుంచి అతడిని శాశ్వతంగా తప్పించింది.

2013లో కాలేయ మార్పిడి చేయించుకున్న బాధితుడు.. అనారోగ్యంతో కొద్దిరోజులకే మరోసారి ఆస్పత్రికి వెళ్లగా ఈ విషయం బయటపడింది. అతడి లివర్​పై 1.6 అంగుళాల సైజులో అక్షరాలు ఉన్నట్లు మరో వైద్యుడు గుర్తించాడు. సదరు బాధితుడికి మొదట చేసిన కాలేయ మార్పిడిలోనూ సైమన్‌ ఇలాగే చేసినట్లు అప్పుడే తెలిసింది. 2013 ఫిబ్రవరి, ఆగస్టులో.. ఇలా రెండుసార్లు కాలేయ మార్పిడి చేసిన సమయంలో వాటిపై తన ఇనీషియల్స్​ను రాసినట్లు సైమన్​ 2017లో తన నేరాన్ని అంగీకరించాడు. అక్షరాలు రాసేందుకు ఆర్గాన్​ బీమ్​ మెషీన్​ను ఉపయోగించినట్లు వివరించాడు.

విషయం బయటకు తెలిసిన అనంతరం.. సైమన్​ 2013లోనే కన్సల్టెంట్​ సర్జన్​ పోస్ట్​ నుంచి సస్పెండ్​ అయ్యాడు. 2014లో విచారణ సమయంలోనే అతడు  తన పదవికి రాజీనామా చేశాడు. కాగా ఈ రెండు కేసుల్లో నిందితుడు​ మొత్తం 13,619 డాలర్లు (రూ. 10 లక్షలకుపైనే) జరిమానా కట్టాలని, సమాజ సేవ చేయాలని ట్రైబ్యునల్ ఆదేశించింది​​. 2020 డిసెంబర్​లో ఎంపీటీఎస్ మరోసారి కేసును సమీక్షించి.. మెడికల్​ ప్రాక్టీస్​ చేయకుండా ఐదు నెలలు సస్పెన్షన్​ విధించింది. అయితే సత్ప్రవర్తన కారణంగా అతడిపై ఉన్న సస్పెన్షన్​ను 2021 జూన్​లో ఎత్తివేసింది. కాగా ఆ సస్పెన్షన్​పై ట్రైబ్యునల్​ నిర్ణయాన్ని తప్పుబట్టిన హైకోర్టు జడ్జి.. నిందితుడిని వైద్య వృత్తి నుంచి తొలగించడమే సముచితమైనదని, అదే అతడికి శిక్ష అని స్పష్టం చేశారు.

సైమన్ ‘ఆటోగ్రాఫ్’​ వల్ల రోగికి ఎలాంటి శారీరక నష్టం జరగకపోయినా.. మానసికంగా ఎప్పటికీ వేధిస్తుందని తాజాగా జరిపిన విచారణలో మెడికల్​ ట్రైబ్యునల్​ కూడా పేర్కొంది. వైద్య వృత్తి నుంచి శాశ్వతంగా తొలగిస్తున్నట్లు తీర్పులో వెల్లడించింది. అయితే 28 రోజుల్లోగా సైమన్​ బ్రామ్​హాల్​కు దీనిపై అప్పీల్​ చేసుకునే అవకాశం ఉంది.