ఉక్రెయిన్‌ ముందుకు.. రష్యా వెనక్కి

బఖ్‌ముత్‌లో మారుతున్న సమీకరణాలు
దూసుకుపోతున్న జెలెన్‌స్కీ సేనలు

రోమ్‌: త్వరలోనే బఖ్‌ముత్‌ను వశం చేసుకుంటామని గత కొన్ని రోజులుగా చెబుతూ వచ్చిన రష్యాకు ఆ నగరంలో వరుస ఎదురుదెబ్బలు తగులుతున్నాయి. ఉక్రెయిన్‌ దళాల ఎదురుదాడికి వెనక్కి మళ్లాల్సిన పరిస్థితులు ఏర్పడుతున్నాయి. ‘‘కొన్ని ప్రాంతాల్లో మా దళాలు దూసుకుపోతున్నాయి. శత్రువుకు తీవ్ర ప్రాణ, ఆయుధ నష్టం కలిగిస్తున్నాం’’ అని ఉక్రెయిన్‌ ఒక ప్రకటనలో పేర్కొంది. తమ దళాలు వెనక్కి మళ్లుతున్న విషయాన్ని రష్యా అంగీకరించింది. అయితే బఖ్‌ముత్‌లో ఇతర ప్రాంతాల్లో దూసుకుపోతున్నట్లు తెలిపింది. మరోవైపు ఉక్రెయిన్‌ అధ్యక్షుడు జెలెన్‌స్కీ శనివారం వాటికన్‌ సిటీలో పోప్‌ ఫ్రాన్సిస్‌ను కలిశారు. ఇటలీ ప్రధాని జార్జియా మెలోనీతోనూ సమావేశం కానున్నారు. అనంతరం ఆయన జర్మనీకి వెళ్లనున్నారని సమాచారం.