చంపేందుకు మళ్లీ కుట్ర: ఇమ్రాన్‌

రావల్పిండి: తనపై హత్యాయత్నం చేసి విఫలమైన ముగ్గురు నేరస్థులు.. మళ్లీ తనను తుదముట్టించేందుకు కుట్ర పన్నుతున్నారని పాక్‌ మాజీ ప్రధాని ఇమ్రాన్‌ఖాన్‌ అన్నారు. శనివారం ఆయన రావల్పిండిలో తన పార్టీ.. తెహ్రీక్‌-ఎ-ఇన్సాఫ్‌ నిర్వహించిన ర్యాలీలో పాల్గొన్నారు. ఈ నెల మూడున తనపై జరిగిన హత్యాయత్నం తర్వాత ఇమ్రాన్‌ ర్యాలీలో పాల్గొనడం ఇదే తొలిసారి. ఈ సందర్భంగా పాక్‌ ప్రధాని షెహబాజ్‌ షరీఫ్‌, హోంమంత్రి సనాఉల్లా, ఐఎస్‌ఐ కౌంటర్‌ ఇంటెలిజెన్స్‌ అధిపతి మేజర్‌ జనరల్‌ ఫైసల్‌ నసీర్‌లే తనపై దాడి వెనుక ఉన్నారని పేర్కొన్నారు. చావుకు భయపడవద్దని తన అనుచరులకు ఇమ్రాన్‌ పిలుపునిచ్చారు.