Biden: ‘హమాస్‌.. అల్‌ఖైదా మాదిరిగానే’: జో బైడెన్‌

వాషింగ్టన్‌: ఇజ్రాయెల్‌ - హమాస్‌ (Israel Hamas Conflict) మధ్య పోరు కొనసాగుతున్న వేళ అగ్రరాజ్యం అమెరికా (USA) అధ్యక్షుడు జో బైడెన్‌ (Joe Biden) కీలక వ్యాఖ్యలు చేశారు. ఈ హమాస్‌ మిలిటెంట్‌ గ్రూప్‌.. అల్‌ఖైదా మాదిరిగానే కన్పిస్తోందని అన్నారు. ఇజ్రాయెల్‌కు తాము అండగా ఉంటామని మరోసారి భరోసా ఇచ్చారు.

‘‘హమాస్‌ దాడిలో 1000 మందికి పైగా ప్రజలు ప్రాణాలు కోల్పోయారు. ఇందులో 27 మంది అమెరికన్లు ఉన్నారు. వీళ్లు (హమాస్‌ గ్రూప్‌ను ఉద్దేశిస్తూ) చాలా దుర్మార్గులు. అల్‌ఖైదా ముష్కరుల్లాగే ప్రవర్తిస్తున్నారు. నేను ముందు నుంచీ చెబుతున్నట్లుగా ఇజ్రాయెల్‌కు అమెరికా అండగా ఉంటుంది. ఇందులో ఎలాంటి మార్పు ఉండబోదు. హమాస్‌ దాడుల నుంచి తమ దేశాన్ని రక్షించుకునే హక్కు ఇజ్రాయెల్‌కు ఉంది’’ అని బైడెన్‌ మరోసారి స్పష్టం చేశారు.

యుద్ధ నియమాలు పాటిస్తున్నారా?.. వాటిని అతిక్రమిస్తే నేరమే

హమాస్‌ దాడులతో పాలస్తీనా పౌరులకు ఎలాంటి సంబంధం లేదన్న వాస్తవాన్ని కూడా మనం గుర్తించాలని బైడెన్‌ ఈ సందర్భంగా అన్నారు. ఈ యుద్ధం ఫలితంగా పాలస్తీనీయులు కూడా తీవ్ర కల్లోల పరిస్థితులను ఎదుర్కొంటున్నారని తెలిపారు. ఇక హమాస్‌ దాడుల అనంతరం కొంతమంది అమెరికా పౌరులకు కన్పించకుండా పోయిన ఘటనపైనా బైడెన్‌ స్పందించారు. వారీ ఆచూకీ గుర్తించి, క్షేమంగా తీసుకొచ్చేందుకు తమ ప్రభుత్వం నిర్విరామంగా కృషి చేస్తోందని తెలిపారు.