Ukraine: కనుచూపు మేరలో వినాశనమే..!

ఇంటర్నెట్‌డెస్క్‌: ఉక్రెయిన్‌(Ukraine)పై రష్యా(Russia) దాడులు మొదలుపెట్టిన నాటి నుంచి ఊహించని వినాశనం చోటు చేసుకొంది. కళ్లముందే మేరియుపోల్‌ వంటి నగరాలు నేలమట్టమయ్యాయి. తాజాగా డొనెట్స్క్‌ ప్రాంతంలోని ఓ పట్టణం ఏ స్థాయిలో ధ్వంసమైందో తెలియజేస్తూ ఉక్రెయిన్‌ విదేశీ వ్యవహారాల శాఖ ఓ ట్వీట్‌ చేసింది. డ్రోన్‌ నుంచి దీనికి సంబంధించిన దృశ్యాలను చిత్రీకరించారు. డొనెట్స్క్‌లోని ‘మరింక’ అనే నగరం దృశ్యాలు కలచివేసివిగా ఉన్నాయి. కనుచూపు మేరలో మొత్తం భూమి కాలిబూడిదైపోయింది. 

గతంలో దాదాపు 10,000 మంది నివాసం ఉన్న ఈ నగరంలో ఇప్పుడు ఎవరూ లేరు. ఇళ్లు పూర్తిగా శిథిలమైపోయాయి. ఈ నగరంలో పేలుడు జరగని ప్రాంతమంటూ కనిపించదు. డాన్‌బాస్‌ వేర్పాటువాదులు దీనిపై తొలిసారి దాడి చేసి ఆధీనంలోకి తీసుకొన్నారు. కానీ, నాలుగు నెలల తర్వాత ఉక్రెయిన్‌ ఈ నగరాన్ని తిరిగి స్వాధీనం చేసుకొంది. ఈ పోరాటాల దెబ్బకు నగరం మొత్తం బూడిద కుప్పగా మారిపోయింది. అక్కడ ఒక్క మనిషి కూడా జీవించడానికి అవకాశం లేకుండా పోయింది.