Diwali at White House: దీపావళి వేడుకలకు శ్వేతసౌధం సన్నాహాలు

వాషింగ్టన్‌: అమెరికా అధ్యక్షుడు జో బైడెన్‌ ఈసారి దీపావళి వేడుకల్ని శ్వేతసౌధంలో నిర్వహించే యోచనలో ఉన్నట్లు అధికార ప్రతినిధి జీన్‌ పియరీ తెలిపారు. గత ఏడాది తరహాలోనే ఈసారి కూడా ఆయన ఉత్సవాల్లో పాల్గొంటారని పేర్కొన్నారు. అయితే, ఎప్పుడు, ఎలా నిర్వహించబోతున్నారనే విషయాన్ని మాత్రం ఇప్పుడే చెప్పలేమన్నారు. భారత్‌తో పాటు అమెరికాలోని ప్రవాస భారతీయులతో ఉన్న అనుబంధం నేపథ్యంలో దీపావళి వేడుకల నిర్వహణకు బైడెన్‌ చాలా ప్రాధాన్యం ఇస్తున్నట్లు పేర్కొన్నారు. బుష్‌ అధ్యక్ష హోదాలో ఉన్నప్పటి నుంచి శ్వేతసౌధంలో దీపావళి వేడుకల్ని అధికారికంగా నిర్వహిస్తూ వస్తున్నారు. మరోవైపు మేరీల్యాండ్‌ గవర్నర్‌ లారెన్స్‌ హోగన్‌ అక్టోబరు నెలను ‘హిందూ సంప్రదాయ మాసం’గా ప్రకటించారు. ఈ నెలలోనే హిందువులు దసరా, దీపావళి, ధనత్రయోదశి వేడుకల్ని నిర్వహించుకోనున్న విషయం తెలిసిందే.