USA: ఏమాత్రం బాధ్యత లేదు: పుతిన్‌ ‘అణు’ వ్యాఖ్యలపై అమెరికా ఫైర్‌

వాషింగ్టన్‌: ఉక్రెయిన్‌(Ukraine) యుద్ధంలో పశ్చిమ దేశాలు ఎక్కువగా జోక్యం చేసుకుంటే.. అది అణు సంక్షోభానికి దారితీస్తుందని రష్యా(Russia) అధ్యక్షుడు పుతిన్‌(Putin) చేసిన హెచ్చరికలను అమెరికా(USA) ఖండించింది.

‘పుతిన్‌ నుంచి ఇలాంటి బాధ్యత లేని మాటలు రావడం ఇదే మొదటిసారి కాదు. ఒక అణ్వాయుధ దేశాధినేత ఇలా మాట్లాడటం సరికాదు. వాటిని వాడటం వల్ల ఎదురయ్యే పరిణామాల గురించి ఇప్పటికే పలుమార్లు రష్యాకు వెల్లడించాం. ఆ దేశం యుద్ధంలో వాటిని వాడటానికి సిద్ధమవుతోందన్న సూచనలు మాత్రం లేవు’ అని అమెరికా విదేశాంగ శాఖ ప్రతినిధి మాథ్యూ మిల్లర్ మీడియాతో అన్నారు.

గాజా ఘటనపై ప్రపంచ దేశాల ఆగ్రహం..!

వచ్చే నెల అధ్యక్ష ఎన్నికలకు వెళ్లనున్న తరుణంలో పుతిన్ ప్రజలనుద్దేశించి ప్రసంగించిన సంగతి తెలిసిందే. ‘‘పశ్చిమ దేశాలు ఉక్రెయిన్‌కు బలగాలను తరలించాలనుకోవడం తీవ్ర పరిణామాలకు దారి తీస్తుంది. వారి భూభాగాల్లోని లక్ష్యాలనూ ఛేదించగల ఆయుధాలు మా వద్ద ఉన్నాయి. ఆ దేశాల నాయకులు ఇప్పటివరకు ఎటువంటి కఠినమైన సవాళ్లను ఎదుర్కోలేదు. యుద్ధం అంటే ఏంటో వారు మర్చిపోయారు’’ అని విరుచుకుపడ్డారు. ఈ సందర్భగా అణు హెచ్చరిక చేశారు.