ఇంటర్నెట్‌ డెస్క్‌: శర్వానంద్‌ కథానాయకుడుగా బి.కిశోర్‌ తెరకెక్కిస్తున్న చిత్రం ‘శ్రీకారం’. ప్రియాంక అరుళ్ మోహన్‌ నాయిక. వ్యవసాయం ప్రధానాంశంగా రూపొందుతోన్న ఈ సినిమా మార్చి 11న విడుదలవుతుంది. ఈ నేపథ్యంలో టైటిల్‌ గీతాన్ని ప్రేక్షకుల ముందుకు తీసుకొచ్చారు. ప్రముఖ దర్శకుడు త్రివిక్రమ్‌ చేతుల మీదుగా ఈ పాట(లిరికల్‌ వీడియో) విడుదలైంది.

‘శ్రీకారం కొత్త సంకల్పానికి.. కలలు చిగురిస్తున్న సంతోషం ఇది, శ్రీకారం కొత్త అధ్యాయానికి.. చిగురు పరిమళమల్లె దీవిస్తున్నదీ పుడమి’ అంటూ సాగే ఈ గీతం అన్ని వర్గాల శ్రోతల్ని అలరించేదిగా ఉంది. వ్యవసాయం మనకు కొత్త కాదు మన తాతల కృషి.. జీన్స్‌ వేసుకున్నా ఆ కళ మన జీన్స్‌లో ఉంది అంటూ సాహిత్యంతో యువతలో స్ఫూర్తినింపే ప్రయత్నం చేశారు రచయిత రామజోగయ్య శాస్త్రి. మిక్కీ జె. మేయర్‌ స్వరాలు సమకూర్చిన ఈ పాటను పృథ్వీ చంద్ర చక్కగా ఆలపించారు.  రావు రమేశ్‌, ఆమని, నరేశ్‌, మురళీ శర్మ, సత్య, సప్తగిరి తదితరులు నటించిన ఈ చిత్రాన్ని 14 రీల్స్‌ ప్లస్‌ పతాకంపై రామ్‌ ఆచంట, గోపీ ఆచంట నిర్మిస్తున్నారు.