స్మార్ట్‌ మాస్క్‌లు..

అవసరానికి తగినట్టుగా అన్నింటినీ స్మార్ట్‌గా మార్చేయడం మనిషికి అలవాటే. ఈ కోవలోనే ఫోన్‌లు మొదలుకుని అన్ని స్మార్ట్‌ గ్యాడ్జెట్‌లు వచ్చేసాయి. ఇకపై ఆ జాబితాలోకి నిత్యం ముఖానికి అంటిపట్టుకుని ఉండే మాస్క్‌లు చేరనున్నాయి. కేవలం వైరస్‌లను అడ్డుకోవడం మాత్రమే కాకుండా మల్టీ టాస్కింగ్‌కి సిద్ధం అవుతున్నాయి. నోటి మాటల్ని అనువాదం చేస్తున్నాయి.. ఎయిర్‌ ప్యూరిఫయర్లుగా గాలిని ఫిల్టర్‌ చేయడం.. హెల్త్‌ మానిటరింగ్‌ సిస్టంలా ఆరోగ్యంపై నిఘా వేయడం చేస్తున్నాయి.. ఇంతకీ ఏంటా మాస్క్‌ల విశేషాలు..

సందర్భం

అనువాదం చేస్తున్నాయ్‌

ఇంకా ఎన్నాళ్లో తెలియదు.. ముఖానికి మాస్క్‌ తప్పని సరి. సామాజిక దూరం అనివార్యం. ఈ నేపథ్యంలో టెక్నాలజీ సంస్థలు, పరిశోధకులు మాస్క్‌ల పరిధిని విస్తృతం చేయడంలో నిమగ్నమయ్యారు అనడంలో సందేహం లేదు. కావాలంటే కపాన్‌ కంపెనీ పరిచయం చేసిన ‘సీ-మాస్క్‌’ని చూడండి. దీన్ని ధరిస్తే అనువాదకుడు వెంట ఉన్నట్టే. తొమ్మిది భాషల్ని సపోర్టు చేస్తుంది. అంటే.. జపనీస్‌లో మాట్లాడితే ఇతర భాషల్లో అనువాదం చేసి వినిపిస్తుందన్నమాట. అంతేకాదు.. మాటల్ని టెక్స్ట్‌ రూపంలో కన్వర్ట్‌ చేసి ఫోన్‌ తెరపై చూపిస్తుంది. ఇంకా చెప్పాలంటే.. మాస్క్‌ పెట్టుకుని మీరు చెప్పే మాటల్ని ఫోన్‌ ద్వారా బిగ్గరగా వినిపించేలా చేస్తుంది. అంటే.. బ్యాంకుల్లాంటి ఇతర కౌంటర్ల దగ్గర ఉన్నప్పుడు ఇరువురి మధ్య సంభాషణల్ని సులభం చేస్తుంది. కౌంటర్లలో దగ్గరున్న ఇరువురికీ స్పష్టంగా వినిపించేలా ఫోన్‌ని దగ్గరగా ఉంచితే చాలు. ఫోన్‌ స్పీకర్‌ ద్వారా స్పష్టమైన సంభాషణని కొనసాగించొచ్చు. దీంతో సామాజిక దూరాన్ని పాటిస్తూనే చక్కని కమ్యూనికేషన్‌ చేయడం సాధ్యం అవుతుంది.

ఆరోగ్యంపై నిఘా..

ఇప్పటి వరకూ మణికట్టుకు ఉన్న ఫిట్‌నెస్‌ బ్యాండ్లు స్మార్ట్‌గా నిత్యం మానిటర్‌ చేస్తూ హెల్త్‌పై నిఘా వేశాయి. ఇప్పుడున్న కరోనాకు చెక్‌ పెట్టేందుకు మాస్క్‌లు కూడా అదే పాత్రని పోషించేందుకు సిద్ధం అవుతున్నాయి. సింగపూర్‌కి చెందిన పరిశోధకులు రూపొందించిన మాస్క్‌ అదే చేస్తుంది. కొవిడ్‌-19 బారిన పడిన వారిని నిత్యం మానిటర్‌ చేసేందుకు ఇవి ఎంతగానో ఉపయోగపడతాయి. వీటిని ధరించడం ద్వారా శరీర ఉష్ణోగ్రత, బీపీ, హార్ట్‌రేట్‌, రక్తంలో ఆక్సిజన్‌ లెవల్స్‌ని ట్రాక్‌ చేయొచ్చు. ఈ మొత్తం డేటాని ప్రత్యేక యాప్‌ ద్వారా ఫోన్‌లో చూడొచ్చు. బ్లూటూత్‌ నెట్‌వర్క్‌ ద్వారా మాస్క్‌ ఫోన్‌తో అనుసంధానం అవుతుంది. ఎక్కువ సంఖ్యలో ఐసోలేషన్‌ వార్డుల్లో ఉన్నవారిని మానిటర్‌ చేసేందుకు ఈ తరహా మాస్క్‌లు డాక్టర్లు, నర్సులకు ఎంతో ఉపయుక్తం. సురక్షితంగా చికిత్స అందించడానికి వీలవుతుంది.

స్వచ్ఛమైన గాలి కోసం..

కరోనా కొంత కాలానికి క్షీణించిపోయినా.. మాస్క్‌ల వాడకం మాత్రం అనివార్యం అవుతుంది అనడంలో సందేహించక్కర్లేదు. ఎందుకంటే.. వాతావరణ కాలుష్యం కోరలు చాచుకుని ఉంది. అలాంటప్పుడు స్వచ్ఛమైన గాలిని పీల్చుకునేలా మాస్క్‌లోని ‘ఎయిర్‌ ప్యూరిఫయర్స్‌’ని నిక్షిప్తం చేస్తున్నాయి కొన్ని గ్యాడ్జెట్‌ తయారీ సంస్థలు. ఇదిగో ఈ కనిపించే మాస్క్‌ని ఎల్‌జీ సంస్థ రూపొందించింది. పేరు ‘ప్యూర్‌కేర్‌’. దీన్ని ధరించడం ద్వారా ఫిల్టర్‌ చేసిన స్వచ్ఛమైన గాలిని పీల్చుకోవచ్చు. అందుకు తగినట్టుగా ముఖానికి అమర్చుకోవచ్చు. మాస్క్‌కి ఇరువైపులా ఏర్పాటు చేసిన ఫిల్టర్ల ద్వారా గాలిని శుద్ధి చేస్తుంది. గాలిలో ఉన్న హానికరమైన అతి సూక్ష్మమైన కాలుష్య కారకాల్ని ఫిల్టర్లు అడ్డుకుంటాయి. గాలిని సులభంగా పీల్చుకునేందుకు వీలుగా ఇరువైపులా ఫిల్టర్లతో పాటు ఫ్యాన్‌లు పని చేస్తాయి. మాస్క్‌ని రెండు గంటలు ఛార్జ్‌ చేస్తే ఎనిమిది గంటలు వాడుకోవచ్చు.

విద్యార్థుల కోసం..

కొన్ని చోట్ల పిల్లలు స్కూల్‌కి వెళ్తున్నారుగానీ.. తల్లిదండ్రులకు చెప్పలేనంత భయం. ఇంటి నుంచి వెళ్లాక పిల్లలు మాస్క్‌ సరిగా పెట్టుకుంటున్నారో లేదో? శరీర ఉష్ణోగ్రత సాధారణంగానే ఉందా? స్కూల్‌ నుంచి తిన్నగా ఇంటికే వస్తున్నారా? .. ఇలా ఏవేవో సందేహాలు. వాటన్నింటికీ సమాధానంగా ఓ ‘స్మార్ట్‌మాస్క్‌’ ముందుకొచ్చింది. దీన్ని ధరించడం ద్వారా నిత్యం పిల్లల్లోని శరీర ఉష్ణోగ్రతల్ని ఎప్పటికప్పుడు ట్రాక్‌ చేయొచ్చు. అలాగే, మాస్క్‌ని సక్రమమైన పద్ధతిలో ధరిస్తున్నారో లేదో చూడొచ్చు. ఒకవేళ ఎప్పుడైనా వాళ్లు నిర్దేశించిన స్కూల్‌ పరిధి దాటి వెళ్తే వెంటనే అలర్ట్‌ అవ్వొచ్చు. ఇదంతా చేతిలో ఉన్న స్మార్ట్‌ ఫోన్‌తోనే ట్రాక్‌ చేయొచ్చు. ఈ మొత్తం డేటాని ఫోన్‌లో ఎప్పటికప్పుడు రివ్యూ చేసి చూడొచ్చు. ఒకవేళ పిల్లల్లో కొవిడ్‌-19 లక్షణాలు కనిపిస్తే.. ఎవరెవరిని కాంటాక్ట్‌ అయ్యారో కూడా తెలుసుకోవడం సులభం. స్కూల్‌ యాజమాన్యం కూడా ఈ స్మార్ట్‌ మాస్క్‌లతో విద్యార్థుల్ని మానిటర్‌ చేయొచ్చు. అందుకోసం మాస్క్‌ అందించే డేటాని మానిటర్‌ చేసేందుకు ప్రత్యేక డాంగిల్‌ యూఎస్‌బీని వాడొచ్చు. దీంట్లోని మరో ప్రత్యేకత ఏంటంటే.. మాస్క్‌కి జత చేసిన చిప్‌సెట్‌ని ఇట్టే తొలగించి మాస్క్‌ని ఉతకొచ్చు. తిరిగి చిప్‌ సెట్‌ని జత చేసి వాడుకోవచ్చు.

Tags :