కృష్ణా నదిలో భూప్రకంపనలు

ప్రధానాంశాలు

కృష్ణా నదిలో భూప్రకంపనలు

శ్రీశైలం డ్యాంకు ఎగువన 44 కిలోమీటర్ల దూరంలో కేంద్రం

ఉలిక్కిపడ్డ నల్లమల

భూకంప లేఖినిపై 3.7గా నమోదు

ఈనాడు, హైదరాబాద్‌-అచ్చంపేట, న్యూస్‌టుడే: నల్లమల అటవీ ప్రాంతం సోమవారం వేకువజామున ఉలిక్కిపడింది. ఐదు గంటల ప్రాంతంలో నల్లమలలోని కృష్ణా నదిలో స్వల్ప భూకంపం సంభవించింది. శ్రీశైలం జలాశయానికి పడమర వైపు 44 కి.మీ దూరంలో, నాగర్‌కర్నూల్‌ జిల్లా కొల్లాపూర్‌కు తూర్పున 18 కి.మీ దూరంలో కృష్ణానదిలో భూకంప కేంద్రాన్ని గుర్తించినట్లు హైదరాబాద్‌లోని జాతీయ భూ భౌతిక పరిశోధన సంస్థ(ఎన్‌జీఆర్‌ఐ) వెల్లడించింది. నల్లమల అడవుల్లో 7 కిలోమీటర్ల లోతున భూకంపం వచ్చినట్లు తెలిపింది. సోమవారం ఉదయం 5 గంటల ప్రాంతంలో కొన్ని సెకన్లపాటు భూమి కంపించిందని, భూకంప లేఖినుల్లో దీని తీవ్రత 3.7గా నమోదైనట్లు ఎన్‌జీఆర్‌ఐ ప్రధాన శాస్త్రవేత్త శ్రీనగేశ్‌ తెలిపారు. భూకంపంతో నల్లమలలోని అచ్చంపేట పట్టణం, కొల్లాపూర్‌, లింగాల, అమ్రాబాద్‌, పదర, ఉప్పునుంతల, బల్మూరు మండలాలతోపాటు శ్రీశైలం సమీప గ్రామాలు, గిరిజన గూడేల ప్రజలు భయాందోళనకు గురయ్యారు. కొన్ని ఇళ్లల్లోని వంటపాత్రలు, గిన్నెలు, డబ్బాలు, బొమ్మలు కిందపడ్డాయి. కొన్ని ప్రాంతాల్లో 4 సెకన్లు, మరికొన్ని చోట్ల మూడు సెకన్లు ప్రభావం చూపిందని, ఒక్కసారిగా శబ్దం రావడంతో ఇళ్ల నుంచి బయటికి వచ్చామని స్థానికులు తెలిపారు.

జలాశయం వద్ద పరిస్థితిపై అధికారుల ఆరా!

భూకంపం నేపథ్యంలో శ్రీశైలం జలాశయం వద్ద పరిస్థితులపై అధికారులు ఆరా తీసినట్లు తెలిసింది. శ్రీశైలం డ్యాం భూగర్భ గ్యాలరీతోపాటు ఈగలపెంటలో భూ ప్రకంపనలు గుర్తించే రెండు సెన్సార్లున్నాయి. ప్రకంపనలను అవి వెంటనే గుర్తించి ఎన్‌జీఆర్‌ఐకి సంకేతాలు పంపాయి. అనంతరం ఎన్‌జీఆర్‌ఐ అధికారులు ప్రకంపనల తీవ్రతను శ్రీశైలం డ్యాం అధికారులకు పంపించారు.


శ్రీశైలం ఆనకట్టకు తప్పిన ముప్పు

భూకంపం వల్ల ఎలాంటి ప్రమాదం వాటిల్లకపోవడంతో శ్రీశైలం ఆనకట్టకు పెద్ద ముప్పు తప్పినట్లయింది. ఆనకట్ట నిర్మించినప్పటి నుంచి ఇప్పటివరకు ఈ ప్రాంతంలో భూకంపాలు ఎప్పుడూ రాలేదని, ఇదే మొదటిసారి అని శాస్త్రవేత్తలు చెబుతున్నారు. భూకంపానికి కారణాలపై అధ్యయనం చేస్తున్న అధికారులు ఆత్మకూర్‌ ఫాల్ట్‌ కారణమని అంచనా వేస్తున్నారు. అక్కడి భూమిలోని రాతిపొరల్లో ఏర్పడిన ఒత్తిడి భూకంపానికి దారితీసి ఉంటుందని శాస్త్రవేత్త శ్రీనగేశ్‌ అన్నారు. ఉదయం నుంచి ఒక్కసారే భూమి కంపించిందని, చిన్న భూకంపమే అయినందున నల్లమల పరిసర ప్రాంతాల ప్రజలు ఆందోళన చెందాల్సిన అవసరం లేదన్నారు. శ్రీశైలం ఆనకట్ట దక్షిణం వైపు ఒకటి రెండుసార్లు ప్రకంపనలు గతంలో వచ్చినా.. అవి చాలా చిన్నవని పరిశోధకులు తెలిపారు.

వరద కారణం కాదు..

ప్రస్తుతం శ్రీశైలం ప్రాజెక్టుకు ఎగువ నుంచి 4 లక్షల క్యూసెక్కుల వరద వస్తోంది. నీటి నిల్వ అంతకంతకూ పెరుగుతోంది. ఈ నేపథ్యంలో ప్రకంపనలు చోటుచేసుకోవడం చర్చనీయాంశమైంది. సాధారణంగా నీటి ప్రవాహాలతో భూమి లోపల ఉన్న పగుళ్లలో సర్దుబాటుతో భూమి కంపిస్తుంది. దీన్నే టెక్టానిక్‌ ఎఫెక్ట్‌ అని అంటారని, ఇలాంటి సందర్భాల్లో ఎక్కువసార్లు భూమి కంపిస్తుంటుందని శాస్త్రవేత్తలు చెబుతున్నారు. పులిచింతలలో గతేడాది జనవరి నుంచి నవంబరు వరకు ఇలాంటి భూ ప్రకంపనలు ఎన్‌జీఆర్‌ఐ శాస్త్రవేత్తలు గుర్తించారు. అక్కడ భూమి పొరల్లోని పగుళ్లలో నీటి సర్దుబాటే కారణమని నిర్ధారణకు వచ్చారు. ప్రస్తుతం శ్రీశైలం ఆనకట్టకు దగ్గరలో భూకంపం ఒక్కసారే వచ్చిందని, భూమి లోపల రాతిపొరల్లో ఒత్తిడి(ఫాల్ట్‌) భూకంపానికి కారణమని అంచనా వేస్తున్నారు. రాత్రి వరకు మళ్లీ ప్రకంపనలు వచ్చినట్లు రికార్డు కాలేదని, దీన్నిబట్టి వరదతో వచ్చిన ప్రకంపనలు అనుకోలేమని శాస్త్రవేత్తలు అంటున్నారు.


Tags :

ప్రధానాంశాలు

జిల్లా వార్తలు

దేవతార్చన


మరిన్ని