బెంగళూరు హ్యాట్రిక్
ఎక్కడైతే ఐపీఎల్ చరిత్రలోనే అత్యధిక స్కోరు రికార్డు నమోదైందో.. ఎక్కడైతే బౌండరీల వరద పారుతుందో.. అక్కడ గుజరాత్ టైటాన్స్ పరుగులు చేసేందుకు ఆపసోపాలు పడింది. బెంగళూరు బౌలర్ల దెబ్బకు కుదేలై కేవలం 147 పరుగులకే కుప్పకూలింది.
టైటాన్స్పై ఘనవిజయం
చెలరేగిన డుప్లెసిస్, కోహ్లి
ఎక్కడైతే ఐపీఎల్ చరిత్రలోనే అత్యధిక స్కోరు రికార్డు నమోదైందో.. ఎక్కడైతే బౌండరీల వరద పారుతుందో.. అక్కడ గుజరాత్ టైటాన్స్ పరుగులు చేసేందుకు ఆపసోపాలు పడింది. బెంగళూరు బౌలర్ల దెబ్బకు కుదేలై కేవలం 147 పరుగులకే కుప్పకూలింది. అదే పిచ్పై పూనకం వచ్చినట్లు డుప్లెసిస్ రెచ్చిపోవడంతో 5.4 ఓవర్లకే 92/0కు చేరుకున్న ఆర్సీబీ అలవోకగా గెలిచేస్తుందనుకుంటే.. ఊహించని పతనం! 25 పరుగుల తేడాలో 6 వికెట్లు కోల్పోయి ఆర్సీబీ గెలుపు మీదే సందేహాలు తలెత్తిన పరిస్థితి. కానీ ఉత్కంఠను అధిగమించిన బెంగళూరు హ్యాట్రిక్ విజయంతో సాంకేతికంగా మిణుకుమిణుకుమంటున్న ప్లేఆఫ్ ఆశలను సజీవంగా ఉంచుకుంది. 11 మ్యాచ్ల్లో నాలుగో విజయంతో పట్టికలో పది నుంచి ఏడో స్థానానికి చేరుకుంది. 11 మ్యాచ్ల్లో టైటాన్స్కిది ఏడో ఓటమి.
బెంగళూరు
ఐపీఎల్- 17లో ఆలస్యంగా పుంజుకున్న రాయల్ ఛాలెంజర్స్ బెంగళూరు వరుసగా మూడో విజయాన్ని ఖాతాలో వేసుకుంది. శనివారం గుజరాత్ టైటాన్స్ను 4 వికెట్ల తేడాతో చిత్తుచేసింది. మొదట గుజరాత్ 19.3 ఓవర్లలో 147 పరుగులకు ఆలౌటైంది. షారుక్ ఖాన్ (37) టాప్స్కోరర్. ‘ప్లేయర్ ఆఫ్ ద మ్యాచ్’ సిరాజ్ (2/29), యశ్ దయాళ్ (2/21), విజయ్కుమార్ వైశాఖ్ (2/23) సత్తాచాటారు. ఛేదనలో డుప్లెసిస్ (64; 23 బంతుల్లో 10×4, 3×6), కోహ్లి (42; 27 బంతుల్లో 2×4, 4×6) అదరగొట్టడంతో బెంగళూరు 13.4 ఓవర్లలోనే 6 వికెట్లు కోల్పోయి లక్ష్యాన్ని చేరుకుంది. టైటాన్స్ బౌలర్లలో జోష్ లిటిల్ (4/45), నూర్ అహ్మద్ (2/23) మెరిశారు.
బాదుడే బాదుడు: ఆర్సీబీ ఏమైనా వేరే పిచ్ మీద బ్యాటింగ్ చేస్తుందా? అప్పటివరకూ టైటాన్స్ బ్యాటర్లు ఆపసోపాలు పడింది అక్కడేనా? అనే సందేహాలు కలిగేలా ఛేదనలో డుప్లెసిస్, కోహ్లి చెలరేగిపోయారు. ఒకటే బాదుడు. కొడితే ఫోర్ లేదా సిక్సర్. బౌండరీల హోరుతో చిన్నస్వామి స్టేడియాన్ని ఊపేశారు. ముఖ్యంగా డుప్లెసిస్ ఊచకోత కోశాడు. తొలి ఓవర్లో రెండు సిక్సర్లతో విధ్వంసాన్ని కోహ్లి మొదలెడితే.. ఆ తర్వాత డుప్లెసిస్ రెచ్చిపోయాడు. లిటిల్కు చుక్కలు చూపించాడు. క్రీజులో నాట్యం చేస్తూ బంతిని బౌండరీ దాటించాడు. మోహిత్ శర్మ కూడా ఎలాంటి ప్రభావం చూపలేకపోయాడు. అతని ఓవర్లో డుప్లెసిస్ నాలుగు ఫోర్లు కొట్టాడు. ఐపీఎల్ అరంగేట్ర స్పిన్నర్ మానవ్నూ వరుసగా రెండు సిక్సర్లతో కోహ్లి శిక్షించాడు. మరోవైపు 18 బంతుల్లోనే అర్ధశతకం అందుకున్న డుప్లెసిస్ ఔటైపోయినా 6 ఓవర్లకు 92/1తో ఆర్సీబీ విజయం ముందే ఖాయమైంది. మరో అయిదారు ఓవర్లలో మ్యాచ్ ముగుస్తుందేమో అనుకుంటే ఆర్సీబీ అనూహ్యంగా తడబడింది. పేసర్ లిటిల్, స్పిన్నర్ నూర్ అహ్మద్ ధాటికి 25 పరుగుల వ్యవధిలో ఆరు వికెట్లు కోల్పోయింది. 92/0తో ఉన్న జట్టు ఒక్కసారిగా 117/6తో కష్టాల్లో పడింది. వేగంగా ఆడాలనే తొందరలో విల్ జాక్స్ (1), రజత్ (2), మ్యాక్స్వెల్ (4), గ్రీన్ (1) ఇలా వచ్చి అలా వెళ్లారు. కాస్త నెమ్మదించిన కోహ్లి చివరి వరకూ ఉండి జట్టును గెలిపిస్తాడనుకుంటే నూర్ స్పిన్కు చిక్కాడు. అప్పటికీ ఆర్సీబీ విజయానికి 56 బంతుల్లో 31 పరుగులు కావాలి. ఓవర్లు చాలా ఉన్నాయి. బ్యాటర్లు నిలబడితే చాలు. మరో వికెట్ పడితే అంతే సంగతనే దశలో దినేశ్ కార్తీక్ (21 నాటౌట్) మరోసారి మెరిశాడు. రషీద్ ఖాన్ ఓవర్లో మూడు ఫోర్లు కొట్టి విజయాన్ని వేగవంతం చేశాడు. స్వప్నిల్ (15 నాటౌట్) సిక్సర్తో లాంఛనం పూర్తిచేశాడు.
బౌలర్లు భళా: దూసుకొచ్చే షార్ట్పిచ్ బంతులు.. మంచి లెంగ్త్లో పడ్డ బంతులను ఆడలేక బ్యాటర్ల తిప్పలు.. టపటపా పడ్డ వికెట్లు.. ఇదీ పవర్ప్లేలో గుజరాత్ పరిస్థితి. ఈ సీజన్లో స్థాయికి తగ్గ ప్రదర్శన చేయడం లేదనే విమర్శలకు సిరాజ్ బౌలింగ్తోనే సమాధానమిచ్చాడు. టీ20 ప్రపంచకప్ జట్టుకు తన ఎంపిక సరైందేనని చాటాడు. వరుస ఓవర్లలో సాహా (1), శుభ్మన్ (2)ను సిరాజ్ పెవిలియన్ చేర్చాడు. సుదర్శన్ (6)ను గ్రీన్ ఔట్ చేయడంతో టైటాన్స్ 23/3తో పవర్ప్లేను ముగించింది. ఈ సీజన్లో పవర్ప్లేలో ఇదే అత్యల్ప స్కోరు. ఆర్సీబీ క్రమశిక్షణతో బౌలింగ్ చేయడంతో పరుగుల కోసం టైటాన్స్ చెమటోడ్చాల్సి వచ్చింది. స్పిన్నర్ కర్ణ్శర్మ (1/42) బౌలింగ్కు రావడంతో పదో ఓవర్లో మిల్లర్ (30) జట్టుకు తొలి సిక్సర్ అందించాడు. గ్రీన్ (1/28) బౌలింగ్లో మిల్లర్ క్యాచ్ను చేజార్చిన కర్ణ్.. వెంటనే తన బౌలింగ్లో అతణ్ని వెనక్కిపంపాడు. మరో ఎండ్లో పట్టుదలతో నిలబడ్డ షారుక్.. కోహ్లి మెరుపు ఫీల్డింగ్కు నిష్క్రమించక తప్పలేదు. వైశాఖ్ బౌలింగ్లో తెవాతియా (35) అక్కడే ఆడగా షారుక్ పరుగు కోసం ప్రయత్నించాడు. అతణ్ని తెవాతియా వెనక్కి పంపినా.. ఆ లోపే పాయింట్ నుంచి వాయువేగంతో పరుగెత్తుకుంటూ వచ్చిన కోహ్లి నాన్స్ట్రైకర్ ఎండ్లో నేరుగా త్రోతో స్టంప్స్ను లేపేశాడు. 16వ ఓవర్లో తెవాతియా వరుసగా 4, 6, 4, 4 బాది ఇన్నింగ్స్కు వేగాన్ని అందించాలని చూశాడు. కానీ ఆర్సీబీ బౌలర్లు ఆ అవకాశమే ఇవ్వలేదు. 13 బంతుల్లోనే మిగతా 5 వికెట్లు పడగొట్టి టైటాన్స్ను ఆలౌట్ చేశారు. తెవాతియా క్యాచ్ను వైశాఖ్ అద్భుతంగా అందుకున్నాడు. ఆఖరి ఓవర్ తొలి మూడు బంతుల్లో మూడు వికెట్లు పడటంతో టైటాన్స్ 150 స్కోరును అందుకోలేకపోయింది.
గుజరాత్ ఇన్నింగ్స్: సాహా (సి) దినేశ్ (బి) సిరాజ్ 1; శుభ్మన్ (సి) వైశాఖ్ (బి) సిరాజ్ 2; సుదర్శన్ (సి) కోహ్లి (బి) గ్రీన్ 6; షారుక్ రనౌట్ 37; మిల్లర్ (సి) మ్యాక్స్వెల్ (బి) కర్ణ్ 30; తెవాతియా (సి) వైశాఖ్ (బి) యశ్ 35; రషీద్ (బి) యశ్ 18; విజయ్ శంకర్ (సి) సిరాజ్ (బి) వైశాఖ్ 10; మానవ్ (సి) స్వప్నిల్ (బి) వైశాఖ్ 1; మోహిత్ రనౌట్ 0; నూర్ అహ్మద్ నాటౌట్ 0; ఎక్స్ట్రాలు 7; మొత్తం: (19.3 ఓవర్లలో ఆలౌట్) 147; వికెట్ల పతనం: 1-1, 2-10, 3-19, 4-80, 5-87, 6-131, 7-136, 8-147, 9-147; బౌలింగ్: స్వప్నిల్ 1-0-1-0; సిరాజ్ 4-0-29-2; యశ్ దయాల్ 4-0-21-2; గ్రీన్ 4-0-28-1; వైశాఖ్ 3.3-0-23-2; కర్ణ్శర్మ 3-0-42-1
బెంగళూరు ఇన్నింగ్స్: కోహ్లి (సి) సాహా (బి) నూర్ 42; డుప్లెసిస్ (సి) షారుక్ (బి) లిటిల్ 64; జాక్స్ (సి) షారుక్ (బి) నూర్ 1; రజత్ (సి) మిల్లర్ (బి) లిటిల్ 2; మ్యాక్స్వెల్ (సి) మిల్లర్ (బి) లిటిల్ 4; గ్రీన్ (సి) షారుక్ (బి) లిటిల్ 1; దినేశ్ కార్తీక్ నాటౌట్ 21; స్వప్నిల్ సింగ్ నాటౌట్ 15; ఎక్స్ట్రాలు 2; మొత్తం: (13.4 ఓవర్లలో 6 వికెట్లకు) 152; వికెట్ల పతనం: 1-92, 2-99, 3-103, 4-107, 5-111, 6-117; బౌలింగ్: మోహిత్ 2-0-32-0; జోష్ లిటిల్ 4-0-45-4; మానవ్ సుతార్ 2-0-26-0; నూర్ అహ్మద్ 4-0-23-2; రషీద్ ఖాన్ 1.4-0-25-0
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
-
బౌలర్ల భవిష్యత్తు కాపాడండి.. అందుకు ఇలా చేయండి: అనిల్ కుంబ్లే
పొట్టి ఫార్మాట్ వచ్చాక బౌలర్లపై బ్యాటర్లదే ఆధిపత్యం. మరీ ముఖ్యంగా ఐపీఎల్ వంటి లీగుల్లో ఇది ఎక్కువైంది. దీనికి చాలా కారణాలు ఉన్నాయి. -
అందరి కళ్లూ అటువైపే.. నాలుగో ప్లేఆఫ్స్ బెర్తు వారిదేనంటున్న లారా
నాలుగు మ్యాచ్లు ఉన్నా సరే.. ఒకే ఒక్క పోరుపై సర్వత్రా ఆసక్తి నెలకొంది. అదే చివరి ప్లేఆఫ్స్ బెర్తును ఖరారు చేసే అవకాశం ఉంది. -
ఏపీఎల్లో చరిత్ర సృష్టించిన ఎస్ఆర్హెచ్ హీరో
ఐపీఎల్లో సత్తా చాటుతున్న తెలుగు కుర్రాడు నితీశ్ కుమార్ రెడ్డి.. ఏపీఎల్లోనూ భారీ ధరను దక్కించుకోవడం విశేషం. -
నువ్వు కొత్త ప్లేయర్వి కాదు.. వరల్డ్ కప్లో సత్తా చాటాలి: గంభీర్
ఆదివారం రాజస్థాన్తో కోల్కతా తన చివరి లీగ్ మ్యాచ్ ఆడనుంది. ఇప్పటికే ఇరు జట్లూ ప్లేఆఫ్స్నకు క్వాలిఫై అయిన సంగతి తెలిసిందే. ఈ క్రమంలో సంజూ ఆటతీరుపై గంభీర్ కీలక వ్యాఖ్యలు చేశాడు. -
వరల్డ్ కప్ జట్టులో హార్దిక్.. విమర్శలపై క్లారిటీ ఇచ్చిన జై షా
వరల్డ్ కప్ జట్టులో కొందరు యువ క్రికెటర్లకు అవకాశం రాలేదు. అనుకోకుండా సీనియర్ ఆల్రౌండర్ హార్దిక్ జట్టులోకి వచ్చాడు. అతడి ఎంపికపై విమర్శలు వస్తున్నాయి. -
ఛెత్రి ఇక చాలని..
ఈ తరానికి భారత ఫుట్బాల్ అంటే టక్కున గుర్తొచ్చే పేరు సునీల్ ఛెత్రి. ఎన్నో చిరస్మరణీయ ప్రదర్శనలతో దేశంలో ఆటకు దాదాపు పర్యాయపదంగా మారిన సూపర్స్టార్ అతడు. కానీ మైదానంలో అతడి పరుగు ఆగనుంది. -
రిటైరైతే కనపడను..
క్రికెట్లో ఉన్నంత కాలం శక్తినంతా ధార పోస్తానని, ఒక్కసారి రిటైరైతే కొంతకాలం ఎవరికీ కనపడనని కింగ్ కోహ్లి అన్నాడు. ఐపీఎల్లో జోరుమీదున్న కోహ్లి ఇప్పటివరకు బెంగళూరు తరఫున 13 మ్యాచ్ల్లో 661 పరుగులు చేశాడు. -
వరుణుడు ఆడుకున్నాడు
ఐపీఎల్-17వ సీజన్లో రసవత్తరంగా మారిన ప్లేఆఫ్స్ రేసును వరుణుడు చప్పగా మార్చేశాడు. పరుగుల పోటీ లేకుండానే సన్రైజర్స్ హైదరాబాద్ను తర్వాతి దశకు చేర్చేశాడు. -
శ్రీజ.. సింగిల్స్లోనూ
తెలుగుతేజం ఆకుల శ్రీజ టీమ్ విభాగంతో పాటు సింగిల్స్లోనూ పారిస్ ఒలింపిక్స్ బరిలో నిలవనుంది. -
క్వార్టర్ఫైనల్లో మీరాబా
థాయ్లాండ్ ఓపెన్ సూపర్ 500 బ్యాడ్మింటన్ టోర్నీలో భారత యువ షట్లర్ మీరాబా లువాంగ్ మైసనాం జోరు కొనసాగుతోంది. -
ఫైనల్లో నిఖత్
ప్రపంచ ఛాంపియన్ నిఖత్ జరీన్ ఎల్డోర్ కప్ ఫైనల్కు దూసుకెళ్లింది. గురువారం మహిళల 52 కిలోల సెమీఫైనల్లో ఆమె 5-0తో కజకిస్థాన్ అమ్మాయి తొమిరిస్ మిర్జాకుల్ను చిత్తు చేసింది. -
భారత ఫుట్బాల్ గుండెచప్పుడు
సునీల్ ఛెత్రి.. భారత ఫుట్బాల్ గుండె చప్పుడు! దాదాపు రెండు దశబ్దాల పాటు అత్యుత్తమ ఆటతో జట్టు భారాన్ని మోసిన వీరుడు. మెరుపు విన్యాసాలతో అభిమానులను మైదానాలకు ఆకర్షించిన సమ్మోహన శక్తి. -
అంజుమ్, స్వప్నిల్ విజయం
ఒలింపిక్ సెలక్షన్ ట్రయల్స్లో అంజుమ్ మౌద్గిల్, స్వప్నిల్ కుశాలె తమ తొలి విజయాలు సాధించారు. మహిళలు, పురుషుల 50మీ 3 పొజిషన్స్లో వాళ్లు విజేతగా నిలిచారు. -
చెన్నైకి గోల్డెన్ ఛాన్స్.. ఇలా జరిగితే ఏకంగా రెండో స్థానానికే!
ఐపీఎల్ 17 సీజన్లో చెన్నై సూపర్ కింగ్స్ (Chennai Super Kings) ఇంకా ప్లేఆఫ్స్కు చేరలేదు. ఆ జట్టు మరో విజయం సాధించి ఇతర జట్ల ఫలితాల అనుకూలిస్తే రెండో స్థానానికి చేరడానికి ఛాన్స్ ఉంది.
తాజా వార్తలు (Latest News)
-
వాళ్లు అధికారంలోకి వస్తే రామమందిరంపైకి బుల్డోజర్లే: కాంగ్రెస్, ఎస్పీపై మోదీ ధ్వజం
-
సాయంత్రం హైదరాబాద్తో పాటు పలు జిల్లాలో భారీ వర్షం: ఐఎండీ
-
స్వాతీమాలీవాల్పై దాడి.. కేజ్రీవాల్ మౌనం సిగ్గుచేటు: నిర్మలా సీతారామన్
-
రంజాన్ నెలలో బాంబింగ్ ఆపాలని ఇజ్రాయెల్కు చెప్పాను: మోదీ
-
స్థిరాస్తి రంగానికి రాష్ట్ర ప్రభుత్వం తోడ్పాటు: తెలంగాణ మంత్రి శ్రీధర్బాబు
-
బౌలర్ల భవిష్యత్తు కాపాడండి.. అందుకు ఇలా చేయండి: అనిల్ కుంబ్లే