అద్వితీయం

ప్రధానాంశాలు

అద్వితీయం

వరుసగా రెండు ఒలింపిక్స్‌లో రెండు పతకాలతో సింధు సంచలనం

టోక్యోలో కాంస్యం సాధించిన తెలుగు తేజం

ఎల్లెడలా ప్రశంసలు

చరిత్ర అంటే చదువుకునేది మాత్రమే కాదు సరికొత్తగా సృష్టించేదని.. తరతరాలుగా చెప్పుకునేలా అది నిలిచిపోవాలని.. ఆమె విజయం చాటింది.

కలలు కనడం వరకే సరిపోదు వాటిని అందుకోవాలని.. అందరూ గర్వించే స్థాయికి చేరాలని.. ఆమె ప్రయాణం తెలిపింది.

పట్టుదలతో కూడిన ప్రయత్నం.. సంకల్పంతో సాగే అంకితభావం.. అసాధ్యాలను దాటి అందుకున్న అద్భుతం.. ఇలా సింధు జీవితం ఓ స్ఫూర్తి పాఠం.

వందేళ్లకు పైగా ఒలింపిక్స్‌ చరిత్రలో మరే భారత మహిళకు సాధ్యం కాని రికార్డు మన సింధు సొంతమైంది. దేశంలో ఒలింపిక్స్‌ ప్రస్తావన వస్తే.. ముందుగా ఆమె పేరే తలుచుకునేలా ఈ భారతావని ముద్దు బిడ్డ మళ్లీ మెరిసింది. ఒలింపిక్స్‌లో ఒక్క పతకం కోసం ఆశగా ఎదురుచూసే ప్రజలకు.. వరుసగా రెండు ఒలింపిక్స్‌ల్లోనూ పతకాలు అందించి ఆ ఘనత అందుకున్న తొలి భారత మహిళగా ఘన కీర్తిని సాధించింది. అయిదేళ్ల క్రితం రియోలో రజతంతో సంచలనం సృష్టించిన ఈ షట్లర్‌.. ఇప్పుడు టోక్యోలో కాంస్యంతో చిరస్థాయిగా నిలిచిపోయింది. పతకమే కాంస్యం.. కానీ మన సింధు ఆట బంగారం. అందుకే ఈ తెలుగు తేజం సాధించింది కంచుపతకమైనా మనకు పసిడితో సమానం.

సెమీస్‌లో ఓటమితో సింధు కుంగిపోలేదు. తన తదుపరి లక్ష్యాన్ని మరిచిపోలేదు. పసిడి గెలవకపోయినా.. ఒలింపిక్స్‌లో కాంస్యమైనా తనకు, తన దేశానికి ఎంత ముఖ్యమో ఆమెకు తెలుసు. అందుకే దెబ్బ తిన్న పులిలా కసిగా మైదానంలో అడుగు పెట్టింది. లోపాలు సవరించుకుంది. దూకుడు పెంచింది. కొత్త సింధును పరిచయం చేస్తూ.. కాంస్య పోరులో ఆద్యంతం ఆధిపత్యం చలాయిస్తూ చైనా ప్రత్యర్థిని చిత్తు చేసింది. ముందు రోజు ఎలా అయితే వరుస సెట్లలో ఓటమి పాలైందో.. అదే తరహాలో విజయం సాధించి కంచు పతకాన్ని ముద్దాడింది. మొన్నటి గాయాలకు మందు రాస్తూ 24 గంటల్లోనే మళ్లీ భారత అభిమానుల ముఖాల్లో చిరునవ్వులు పూయించింది.

అందుకే ఇప్పుడు దేశమంతా అంటోంది.. సాహో సింధు!!


రెండు ఒలింపిక్స్‌ల్లో పతకాలు గెలిచిన తొలి భారత మహిళగా సింధు నిలిచింది. నిలకడ, అంకితభావం, అద్భుత ప్రదర్శనకు ఆమె కొత్త ప్రమాణాలు నెలకొల్పింది. భారత్‌కు ఖ్యాతి తెచ్చిన ఆమెకు హృదయపూర్వక అభినందనలు.

- రాష్ట్రపతి కోవింద్‌


సింధు విజయం భారతీయులకు గర్వకారణం

-  ఉపరాష్ట్రపతి వెంకయ్యనాయుడు

ఈనాడు, హైదరాబాద్‌: టోక్యోలో అమోఘమైన ప్రదర్శనతో సింధు సాధించిన ఘనత పట్ల ప్రతి భారతీయుడు గర్వపడుతున్నాడని ఉప రాష్ట్రపతి వెంకయ్య నాయుడు అన్నారు. భవిష్యత్‌లో ఆమె మరిన్ని గొప్ప విజయాలు సొంతం చేసుకోవాలని ఆకాంక్షిస్తున్నట్లు పేర్కొన్నారు. పీవీ సింధుకు గవర్నర్‌ తమిళిసై అభినందనలు తెలిపారు. సింధు తన క్రీడాసామర్థ్యంతో గొప్ప ఘనతను సాధించి దేశానికి గర్వకారణంగా నిలిచారన్నారు. మంత్రులు కేటీఆర్‌, హరీశ్‌రావు, శ్రీనివాస్‌గౌడ్‌, తలసాని, గంగుల కమలాకర్‌, సత్యవతి రాథోడ్‌, సబితారెడ్డి, ప్రణాళిక సంఘం ఉపాధ్యక్షుడు వినోద్‌కుమార్‌, ఎమ్మెల్సీ కల్వకుంట్ల కవిత, సాట్స్‌ ఛైర్మన్‌ వెంకటేశ్వర్‌రెడ్డిలు అభినందనలు తెలియజేశారు.  సింధు విజయం సాధించడం భారతీయులకు.. ప్రధానంగా తెలుగు ప్రజలకు గర్వకారణమని భాజపా రాష్ట్ర అధ్యక్షుడు బండి సంజయ్‌ అన్నారు. ఒలింపిక్స్‌లో  పతకం సాధించిన సింధుకు పీసీసీ అధ్యక్షుడు, ఎంపీ రేవంత్‌రెడ్డి శుభాకాంక్షలు తెలిపారు.


పీవీ సింధు అద్భుత ప్రదర్శన మా అందరికీ అమితానందాన్ని కలిగించింది. టోక్యోలో కాంస్యం గెలిచిన ఆమెకు అభినందనలు. ఆమె భారత్‌కు గర్వకారణం. మన గొప్ప ఒలింపియన్లలో ఆమె ఒకరు.

- ప్రధాని మోదీ


టోక్యో ఒలింపిక్స్‌లో మహిళల సింగిల్స్‌ బ్యాడ్మింటన్‌లో కాంస్య పతకాన్ని గెలుచుకున్న పీవీ సింధుకు అభినందనలు. వరుసగా రెండు ఒలింపిక్స్‌ల్లో పతకాలను సాధించిన మొదటి భారత మహిళా క్రీడాకారిణిగా ఆమె చరిత్ర సృష్టించారు.

- ముఖ్యమంత్రి కేసీఆర్‌


రెండు ఒలింపిక్స్‌లో పతకాలు నెగ్గిన భారత రెండో అథ్లెట్‌ సింధు. రెజ్లర్‌ సుశీల్‌కుమార్‌ (2008 బీజింగ్‌, 2012 లండన్‌) భారత్‌ తరఫున తొలిసారి ఈ ఘనత సాధించాడు.


ఒలింపిక్స్‌ బ్యాడ్మింటన్‌లో భారత్‌కు ఇది హ్యాట్రిక్‌ పతకం. 2012 లండన్‌లో సైనా నెహ్వాల్‌ కాంస్యం సాధించగా.. 2016 రియోలో సింధు రజతంతో మెరిసింది. తాజాగా టోక్యోలో కాంస్యంతో పతకానందంలో ముంచెత్తింది.


ఒలింపిక్స్‌ బ్యాడ్మింటన్‌ సింగిల్స్‌ చరిత్రలో రెండు పతకాలు నెగ్గిన మూడో క్రీడాకారిణిగా సింధు రికార్డు సృష్టించింది. 2004, 2008లలో జాంగ్‌ నింగ్‌ (చైనా) స్వర్ణాలు గెలిచింది. సుసి సుశాంతి (ఇండోనేసియా) 1992లో స్వర్ణం, 1996లో కాంస్యం సాధించింది.




Tags :

ప్రధానాంశాలు

జిల్లా వార్తలు

దేవతార్చన


మరిన్ని