బీజింగ్‌: అమెరికాతో వాణిజ్య యుద్ధం కొనసాగుతున్నప్పటికీ చైనాలోని కుబేరులు మరింత ధనవంతులయ్యారు. ఆర్థిక రంగం మందగమనంలో ఉన్నప్పటికీ ఇబ్బందులను అధిగమించారు. ‘హురున్‌ ధనవంతుల నివేదిక’లోని తాజా వివరాల ప్రకారం గత ఏడాది(2018)తో పోల్చినప్పుడు 1,800 మంది ధనవంతుల ఆస్తులు ఈ ఏడాది 10 శాతం మేర పెరిగాయి. ఈ-కామర్స్‌ దిగ్గజం ఆలీబాబా సంస్థ ఛైర్మన్‌గా గత నెలలో పదవీ విరమణ చేసిన జాక్‌ మా 39 బిలియన్‌ డాలర్లు (రూ.2.77లక్షల కోట్లు) ఆస్తితో ప్రథమ స్థానంలో నిలిచారు. ఐటీ, సామాజిక మాధ్యమాలు, ఔషధాలు, విద్యా రంగంలో ఉన్నవారి ఆస్తులు పెరిగాయి. వస్తువుల తయారీ వంటి సంప్రదాయ రంగాల్లో ఉన్న వారి ఆస్తులు తగ్గాయి. దాంతో మొత్తం ధనవంతుల సంఖ్యలో తగ్గుదల కనిపించింది. 2018లో కుబేరుల జాబితాలో 1,893 మంది ఉండగా, ఈ ఏడాది వారి సంఖ్య 1,819కి పడిపోయింది.