తాగునీరు పట్టుకుని రైలు ఎక్కుతూ జారిపడిన ప్రయాణికుడు

గాయాలపాలై చికిత్స పొందుతూ మృతి

 

రాజమహేంద్రవరం నగరం: తాగునీటి కోసం రైలు దిగి తిరిగి ఎక్కే క్రమంలో జారిపడిన ఓ వ్యక్తి తీవ్ర గాయాలతో చికిత్స పొందుతూ మృతి చెందాడు. ఈ సంఘటన రాజమహేంద్రవరం రైల్వేస్టేషన్‌లో బుధవారం చోటు చేసుకుంది. రైల్వే పోలీస్‌స్టేషన్‌ ఎస్సై మావుళ్లు తెలిపిన వివరాల మేరకు దిబ్రూఘడ్‌ - తామ్రం (నంబరు 15930) ఎక్స్‌ప్రెస్‌ ఉదయం 9.03 గంటలకు స్టేషన్‌కు వచ్చిందన్నారు. ఆ సమయంలో సాధారణ బోగీలోని ఓ ప్రయాణికుడు తాగునీటిని పట్టుకునేందుకు ప్లాట్‌ఫాంపైకి దిగాడు. రైలు బయలు దేరుతుండటంతో కంగారుపడుతూ బండి ఎక్కే ప్రయత్నం చేశాడు. ఆ క్రమంలో గుమ్మానికి ఉన్న ఇనుపకడ్డీని బలంగా ఢీకొని కింద పడిపోయాడు. స్టేషనులో ప్రథమ చికిత్స నిర్వహించి, అతడిని 108 వాహనంలో ప్రభుత్వ ఆసుపత్రికి తరలించారు. అక్కడ చికిత్స పొందుతూ మృతి చెందాడు. ప్రయాణికుడి వివరాలు తెలియరాలేదని, ఈ మేరకు కేసు నమోదు చేసి దర్యాప్తు చేస్తున్నట్లు ఎస్సై చెప్పారు.