రసం పొడి ఇలా చేయండి!

మనలో చాలా మందికి పప్పు చారు అంటే ఎంత ఇష్టమో రసం కూడా అంతే ఇష్టం. ముఖ్యంగా తమిళుల రసం మరీ మరీ బాగుంటుంది. అయితే రసం పౌడర్‌ బయట కొనుక్కోవాల్సిన అవసరం లేకుండా ఇంట్లోనే సులువుగా చేసుకోవచ్చు. ఏమేం కావాలంటే.. కందిపప్పు, శనగపప్పు, జీలకర్ర, మిరియాలు పావు కప్పు చొప్పున, ధనియాలు అర కప్పు, ఏడెనిమిది ఎండు మిరపకాయలు, ఇంగువ, పసుపు చెంచా చొప్పున తీసుకుంటే  పావు కిలో రసం పొడి తయారవుతుంది.

ఎలా చేయాలంటే.. ముందుగా శనగ, కందిపప్పులను వేయించి తీయాలి. అదే కడాయిలో ధనియాలు వేయించాలి. అవి తీసి జీలకర్ర, తర్వాత మిరియాలు వేయించాలి. ఆ తర్వాత  మిరపకాయలు, కరివేపాకు కలిపి వేయించాలి. ఇలా ఒకదాని తర్వాత ఒకటిగా వేయించి.. చల్లారాక మిక్సీ జార్‌లో వేయాలి. వాటికి ఇంగువ, పసుపు జతచేసి గ్రైండ్‌ చేయాలి. అంతే రసం పొడి తయారైపోతుంది. దీన్ని తడి లేని, గాలి చొరబడని సీసాలో నిలవ చేసుకుంటే.. క్షణాల్లో ఘుమఘుమలాడే రసం చేసుకోవచ్చు. రసం నోటికి హితవుగానూ ఉంటుంది, తిన్నది తేలిగ్గా జీర్ణమవుతుంది కూడా.