ఆ కాలును మడతపెట్టీ...!

‘ఆ కుర్చీని మడతపెట్టి..’ అనే పాట నిన్నటిదాకా కుర్రకారుని ఊపేసింది. ఇప్పుడు ‘నీ కాలుని మడతపెట్టి..’ అనే ఛాలెంజ్‌ అంతర్జాలాన్ని చుట్టేస్తోంది. ఇదొక ఫిట్‌నెస్‌ ఛాలెంజ్‌. సింగిల్‌ లెగ్‌ స్క్వాట్‌లా ఉండే ఈ వ్యాయామంలో ఒక కాలును మడతపెట్టి పైకి లేవడం చాలా కష్టమంటున్నారు ఫిట్‌నెస్‌ గురూలు. వివరాల్లోకి వెళ్తే..

ఏంటీ ఛాలెంజ్‌?: ఇది ఒక వ్యక్తి శరీరం బ్యాలెన్స్, స్ట్రెంగ్త్, ఫ్లెక్సిబిలిటీని సూచించే సవాలు. ఒకే కాలుతో చేసే స్క్వాట్‌ వర్కవుట్‌లా ఉంటుంది. 
ఎలా చేయాలి?: ముందు నిటారుగా నిల్చోవాలి. ఏదైనా ఒక కాలును బాగా వెనక్కి చాచాలి. వెనక్కి చాచిన ఆ కాలుని చేత్తో పట్టుకొని, మోకాలుపై మడిచి నేలకు ఆనించి పైకి లేవాలి.
కష్టమే: ఇలా చేయడం చెప్పినంత తేలిక కాదండోయ్‌. ఎంతో ఎంతో సాధన, ఒడుపు ఉంటేగానీ దీన్ని చేయడం అందరివల్లా కాదు. అందుకే ఈ ఛాలెంజ్‌ అంతర్జాలాన్ని ముంచెత్తుతోంది. 
లాభాలు: తొడలు, పిరుదులు, స్నాయువు, లోయర్‌బాడీకి మంచి వ్యాయామం. నడుము కిందిభాగంలోని కండరాలు దృఢమవుతాయి. తరచూ చేస్తుంటే శరీరం నియంత్రణలో ఉంటుంది. తుంటి కదలికలు సాఫీగా ఉంటాయి. 
సాఫీగా చేస్తేనే..: అయితే ఇందులో ఏమాత్రం తేడా వచ్చినా.. కండరాలు పట్టేయడం.. గాయాల పాలవడమూ ఉంటాయి. అందుకే బాగా ప్రాక్టీస్‌ చేశాకే ప్రయత్నించాలి.