Andhra News: ప్రైవేటు పాఠశాలలకు అమ్మఒడి ఎందుకు?: వైకాపా ఎమ్మెల్యే రఘురామిరెడ్డి

చాపాడు, న్యూస్‌టుడే: ప్రైవేటు పాఠశాలల్లో చదువుతున్న విద్యార్థులకు అమ్మఒడి ఇవ్వడం తగదని కడప జిల్లా మైదుకూరు వైకాపా ఎమ్మెల్యే శెట్టిపల్లి రఘురామిరెడ్డి అన్నారు. శుక్రవారం కడప జిల్లా చాపాడు మండల పరిషత్తు సర్వసభ్య సమావేశంలో ఎమ్మెల్యే మాట్లాడుతూ.. బాగా డబ్బులున్నవారే ప్రైవేటు పాఠశాలల్లో చదివిస్తారని, అలాంటి వారికి అమ్మఒడి ఇవ్వాల్సిన అవసరం లేదని ప్రభుత్వానికి సూచిస్తానన్నారు. జిల్లాలో స్త్రీ, శిశు సంక్షేమశాఖ (ఐసీడీఎస్‌) అవినీతిలో కూరుకుపోయిందని ఆ శాఖాధికారులపై ఆగ్రహం వ్యక్తం చేశారు. సూపర్‌వైజర్ల బదిలీల్లో ఎవరు డబ్బులిస్తే వారిని కాల పరిమితుల్లేకుండా కావాల్సిన చోటికి బదిలీలు చేసుకుంటున్నారని తెలిపారు. ఎక్కడా పర్యవేక్షణ లేదని, లబ్ధిదారులకు సరిగా ఆహారం అందడంలేదని మండల సమావేశం తీర్మానం చేస్తున్నట్లు రాయాలని ఎమ్మెల్యే ఎంపీడీవోను ఆదేశించారు.