నేను సమావేశం ఏర్పాటు చేస్తే రారా?

పార్టీ నేతలపై మంత్రి ధర్మాన ఆగ్రహం

అరసవల్లి, న్యూస్‌టుడే: శ్రీకాకుళం జిల్లా కేంద్రంలో గురువారం నిర్వహించిన వైకాపా నియోజకవర్గస్థాయి సమావేశానికి 50 డివిజన్లకు ఏకంగా 24 డివిజన్ల పార్టీ ఇన్‌ఛార్జులు గైర్హాజరవడంతో మంత్రి ధర్మాన ప్రసాదరావు ఆగ్రహం వ్యక్తంచేశారు. ఈ సమావేశంలో ఆయన మాట్లాడుతూ... ‘ముఖ్యమంత్రి జగన్‌మోహన్‌రెడ్డి మూడేళ్ల తర్వాత జిల్లాకు రానున్నారు. దీనిపై స్వయంగా నేను సమావేశం ఏర్పాటు చేస్తే డివిజన్‌ ఇన్‌ఛార్జులు రారా...? హాజరు కానివారందర్నీ ఈ రాత్రికే తొలగించి, కొత్త వారిని నియమించండి. ముఖ్యమంత్రి నా కదలికలపైనా దృష్టి పెట్టారు. గడపగడపకు వెళ్తున్నారా? కార్యకర్తలు హాజరవుతున్నారా? లేదా? అనేది తెలుసుకుంటున్నారు. ఇంతమంది రాకుంటే క్షేత్రస్థాయి సమాచారం ఎలా తెలుస్తుంది? రాలేని వారు అవసరం లేదు’ అంటూ మండిపడ్డారు.