అడవుల్లో రోడ్లేసి.. గ్రామాల్లో వేయరా?

గడపగడపలో ఉప ముఖ్యమంత్రికి నిరసన సెగ

వెదురుకుప్పం, న్యూస్‌టుడే: గడప గడపకు మన ప్రభుత్వం కార్యక్రమంలో ఉప ముఖ్యమంత్రి నారాయణస్వామికి నిరసన సెగ తగిలింది. మంగళవారం చిత్తూరు జిల్లా వెదురుకుప్పం మండలం మాంబేడు పంచాయతీ దిగువ గెరిగదొన ఎస్సీ కాలనీలో ఆయన పర్యటించారు. ప్రతి ఇంటికీ వెళ్లి వారికి అందుతున్న సంక్షేమ పథకాలను వాకబు చేశారు. పురుషోత్తపురం, దిగువ గెరిగదొనలకు వెళ్లే దారిని బాగు చేయలేదని, కంకర తేలిన దారిపై నడుస్తూ ఇబ్బందులు పడుతుంటే మీరు అడవుల్లో రోడ్లేసి.. గ్రామాల్లో వేయరా అంటూ కాలనీకి చెందిన గోపి వ్యక్తి ఆయన్ను ప్రశ్నించారు. దీంతో అసహనానికి గురైన ఉప ముఖ్యమంత్రి ‘నువ్వు తెదేపాకు చెందిన వాడివి, చెప్పుడు మాటలు విని ప్రశ్నించడం తగదు’ అన్నారు. తాను వైకాపాకు చెందిన వ్యక్తినేనని గోపి చెప్పగా.. దారి సమస్య తెదేపా హయాంలోనిదే అంటూ చంద్రబాబుపై నారాయణస్వామి మరిన్ని విమర్శలు చేశారు. అనంతరం ఆర్కేఎం పురం ఉన్నత పాఠశాలలో విద్యార్థులకు జగనన్న విద్యాకానుక కిట్లు పంపిణీ చేశారు.