నీరుగారుతున్న ‘నాడు-నేడు’!

న్యూస్‌టుడే, దేవరాపల్లి: ఆసుపత్రిలోని ప్రసూతి గది కురుస్తుంటే.. అందులోని గర్భిణి తడవకుండా పురుడు పోసేందుకు సిబ్బంది నానా కష్టాలుపడ్డారు. అనకాపల్లి జిల్లా దేవరాపల్లి కమ్యూనిటీ ఆరోగ్య కేంద్రంలో ‘నాడు-నేడు’ పనులు చేపట్టారు. బిల్లులు రాలేదని గుత్తేదారు పనులు ఆర్నెల్ల కిందట వదిలేశారు. ఆసుపత్రి పైకప్పు పెచ్చులు పెకలదీసి, శిథిలాలను అక్కడే ఉంచారు. వర్షాలకు పైకప్పు నుంచి నీరు లీకవుతోంది. ప్రసవాలు చేసే గదీ కురుస్తోంది. గురువారం ఉదయం ఓ గర్భిణికి ప్రసవం చేయాల్సి ఉండగా.. అదే సమయంలో వానొచ్చింది. చివరికి గర్భిణి ఉన్న బల్లను ఒక మూలకు చేర్చి.. గదిలో నీరు కారుతున్న చోటల్లా బకెట్లు, బేసిన్లు పెట్టి కాన్పు చేశారు. ఈ వానాకాలం మొత్తం ఇలానే గడిచిందని ఆసుపత్రి సిబ్బంది తెలిపారు.