రాజరాజేశ్వరిదేవిగా దర్శనమిచ్చిన దుర్గమ్మ

ఈనాడు, అమరావతి: విజయవాడ దుర్గగుడిలో దసరా శరన్నవరాత్రోత్సవాలు బుధవారంతో ముగిశాయి. బుధవారం విజయదశమి సందర్భంగా రాజరాజేశ్వరిదేవి రూపంలో అమ్మవారు భక్తులకు దర్శనమిచ్చారు. చివరి రోజు భక్తులు పోటెత్తారు. మొత్తంగా పది రోజుల్లో 12లక్షల మందికి పైగా భక్తులు ఆలయానికి తరలివచ్చారు. ఏటా ఉత్సవాల చివరి రోజు నిర్వహించే తెప్పోత్సవం ఈసారి రద్దయింది. కృష్ణా నదిలో నీటి ప్రవాహం అధికంగా ఉండటం, బుధవారం ఉదయం నుంచి ఎడతెరిపి లేకుండా వర్షం కురుస్తుండటంతో ఈ నిర్ణయం తీసుకున్నారు.

నిజరూప అలంకారంలో భ్రమరాంబాదేవి దర్శనం

శ్రీశైలం ఆలయం, న్యూస్‌టుడే: అష్టాదశ శక్తిపీఠ క్షేత్రమైన శ్రీశైలంలో దసరా మహోత్సవాలు బుధవారం ఘనంగా ముగిశాయి. ఉత్సవాల ముగింపు సందర్భంగా సాయంత్రం 6.30 గంటలకు భ్రమరాంబాదేవి నిజరూప అలంకారంలో భక్తులకు దర్శనమిచ్చారు. ఆలయ పుష్కరిణి వద్ద అలంకరించిన తెప్పపై స్వామిఅమ్మవార్లను కొలువుదీర్చి తెప్పోత్సవాన్ని నిర్వహించారు.