పంటభూమి మునిగి.. గుండె చెరువైంది!

ప్రకాశం జిల్లా కొత్తపట్నం మండలం అల్లూరు గ్రామం వద్ద శుక్రవారం కనిపించిన పరిస్థితి ఇది. ఇక్కడ వెద పద్ధతిలో 300 ఎకరాల్లో వరి వేశారు. మరికొంత మంది మిర్చి, శనగ వేసేందుకు భూమిని సిద్ధం చేశారు. రెండురోజుల పాటు కురిసిన భారీ వర్షాలకు పోతురాజు కాలువ, నల్ల వాగుల నీరు ఈ పొలాలను ముంచెత్తింది. ఎగువ నుంచి ఇంకా ప్రవాహం వస్తూనే ఉంది. పంట కుళ్లిపోయే ప్రమాదముందని రైతులు ఆందోళన వ్యక్తంచేస్తున్నారు. అల్లూరుకు చెందిన రైతు సుధాకర్‌రెడ్డి మాట్లాడుతూ 15 ఎకరాల్లో వరి వేశానని.. ఎకరాకు రూ.15 వేల వరకు ఖర్చయిందన్నారు. నీళ్లు ఎక్కువ  రోజులు నిల్వ ఉంటే ఇప్పుడు పెట్టిన పెట్టుబడి వృథా అవుతుందని, మళ్లీ పంట వేయడానికి భూమిని సిద్ధం చేయాలని ఆవేదన చెందారు. సమీపంలోని కొప్పోలు, చింతల ప్రాంతాల్లోనూ పొలాలు చెరువులను తలపిస్తున్నాయి.

-ఈనాడు, ఒంగోలు