నేడు గవర్నర్‌తో సీఎం జగన్‌ భేటీ

ఈనాడు డిజిటల్‌, అమరావతి: ముఖ్యమంత్రి జగన్‌ సోమవారం సాయంత్రం 5 గంటలకు రాజ్‌భవన్‌లో గవర్నర్‌ జస్టిస్‌ అబ్దుల్‌ నజీర్‌తో భేటీ కానున్నారు. అంతకుముందు ఉదయం 10 గంటలకు తాడేపల్లి నివాసం నుంచి బయలుదేరి 10:55 గంటలకు ప్రకాశం జిల్లా టంగుటూరు మండలం కారుమంచి చేరుకుంటారు. కొండెపి నియోజకవర్గ వైకాపా ఇన్‌ఛార్జి వరికూటి అశోక్‌బాబు తల్లి కోటమ్మ భౌతికకాయానికి నివాళి అర్పిస్తారు. సాయంత్రం గవర్నర్‌ను కలుస్తారు.

* మంగళవారం సీఎం విశాఖ పర్యటనకు వెళ్లనున్నారు. సాయంత్రం 4 గంటలకు తాడేపల్లి నివాసం నుంచి బయలుదేరి 5:15 గంటలకు విశాఖ చేరుకుంటారు. 7-8 గంటల మధ్య రిషికొండ రాడిసన్‌ బ్లూ రిసార్ట్స్‌లో జీ-20 ప్రతినిధులను కలుస్తారు. అనంతరం వారితో భోజనం చేసి, రాత్రి 8:45 గంటలకు విశాఖ నుంచి బయలుదేరి, తాడేపల్లికి చేరుకుంటారు.