ప్రయాణ దూరాన్ని బట్టి ఇండిగో ఇంధన ఛార్జీ

దిల్లీ: విమాన ఇంధన (ఏటీఎఫ్‌) ధరలు అంతకంతకూ పెరుగుతున్న నేపథ్యంలో, సంస్థపై ఆర్థిక భారాన్ని తగ్గించుకునేందుకు టికెట్‌ ధరలపై ఏటీఎఫ్‌ ఛార్జీ విధిస్తున్నట్లు దేశీయ అగ్రగామి విమానయాన సంస్థ ఇండిగో వెల్లడించింది. విమాన ప్రయాణ దూరాన్ని బట్టి ఇది ప్రతి టికెట్‌పై రూ.300-1000 వరకు ఉంటుందని, ఈనెల 6  నుంచి ఇది అమల్లోకి వచ్చినట్లు స్టాక్‌ఎక్స్ఛేంజీలకు సమాచారం ఇచ్చింది. గత 3 నెలలుగా ఏటీఎఫ్‌ ధరలు క్రమం తప్పకుండా పెరుగుతూ ఉన్నందునే ఈ నిర్ణయానికి వచ్చినట్లు పేర్కొంది.

విమానయాన సంస్థల నిర్వహణ వ్యయంలో ఏటీఎఫ్‌ వాటాయే 40-45 శాతం ఉంటుంది. వరుసగా ఇంధన ధరలు పెరుగుతున్నందున, టికెట్‌ ధరలను ఈ మేరకు సవరించాలని భావిస్తున్నట్లు ఇండిగో తెలిపింది. తమ విమానాల్లో టికెట్‌ కొనుగోలు చేసుకునేవారికి, ఆయా మార్గాల్లో ప్రయాణించే దూరానికి అనుగుణంగా ఈ ఛార్జీ మారుతుందని వివరించింది.  విమానం టేకాఫ్‌, ల్యాండింగ్‌ సమయంలో అధిక ఇంధనాన్ని వినియోగించుకుంటుంది. ఆకాశంలో తగిన ఎత్తుకు చేరాక ప్రయాణించేప్పుడు కాస్త తక్కువగానే ఇంధనం వినిమయమవుతుంది. అందుకనుగుణంగా దేశీయ, అంతర్జాతీయ మార్గాల్లో ప్రయాణించే వారికి ఇంధన ఛార్జీ అమలు చేస్తామని ఇండిగో వివరించింది.