HYD: ఆ అమ్మాయి న్యూడ్‌ కాల్స్‌తో నన్ను వేధిస్తోంది: యువకుడి ఫిర్యాదు

గచ్చిబౌలి: ఇన్‌స్టాగ్రామ్‌లో వేధిస్తున్న యువతిపై గచ్చిబౌలి పోలీస్‌ స్టేషన్‌లో ఫిర్యాదు చేశాడో యువకుడు. న్యూడ్‌కాల్స్‌ పేరుతో యువకులను ట్రాప్‌ చేస్తోందని తెలిపాడు. వీడియో కాల్‌ రికార్డు చేసి న్యూడ్‌గా మారుస్తోందని.. వాటిని సామాజిక మాధ్యమాల్లో పెడతానంటూ బెదిరింపులకు పాల్పడుతోందని వాపోయాడు. ఈ ఘటనపై ఇన్‌స్పెక్టర్‌ గోనె సురేష్‌ తెలిపిన వివరాల ప్రకారం.. గచ్చిబౌలిలోని ఓ ప్రైవేటు బ్యాంకులో పనిచేస్తున్న యువకుడు(26)కి నాలుగు రోజుల క్రితం ఇన్‌స్టాగ్రామ్‌లో స్వీట్‌గర్ల్‌ 948ఐడీ పేరిట ఉన్న ఓ యువతితో పరిచయం ఏర్పడింది. స్నేహం పేరిట తొలుత వీరిద్దరి మధ్య సంభాషణ సాగింది. ఫోన్‌ నంబర్లు మార్చుకొని చాటింగ్‌ మొదలుపెట్టారు. 

ఆ తరువాత రెండు రోజులు వాట్సాప్ వీడియో కాల్‌లో మాట్లాడుకున్నారు. ఈ క్రమంలో ఆ మాయ లేడి నగ్నంగా వీడియో కాల్స్‌ చేసింది. తానేం తక్కువ కాదంటూ అతడూ రెచ్చిపోయాడు. ఈ క్రమంలో ఆమె ఉచ్చులో పడ్డారు. అతని నగ్న వీడియోలు, చిత్రాలను సేకరించిన ఆ కిలాడి యువతి వాటిని సామాజిక మాధ్యమాల్లో పోస్టు చేస్తానంటూ బెదిరింపులకు దిగింది. రూ.5వేలు, 10వేలు పంపాలంటూ మెసేజ్‌లు పంపిస్తోంది. దీంతో విసిగిపోయిన బాధితుడు గురువారం గచ్చిబౌలి పోలీసులను ఆశ్రయించాడు. ఈ మేరకు పోలీసులు కేసు నమోదు చేసి దర్యాప్తు చేస్తున్నారు.