న్యాయవాదుల హత్య కేసులో మరొకరి అరెస్టు

హైదరాబాద్‌: హైకోర్టు న్యాయవాద దంపతులు వామన్‌రావు-నాగమణి హత్యకేసులో మరొకరు అరెస్టు అయ్యారు. ఈ హత్య కేసులో నిందితుడిగా ఉన్న బిట్టు శ్రీనుకు సహకరించిన మంథనికి చెందిన కాపు అనిల్‌ను పోలీసులు మంగళవారం అరెస్టు చేశారు. ఈ కేసులో ఇప్పటివరకు పోలీసులు ఐదుగురిని అరెస్టు చేశారు. మంగళవారం బిట్టు శ్రీనును పోలీసులు కోర్టు హాజరుపరిచారు. న్యాయస్థానం విచారణ జరిపి అతడికి 14 రోజుల జ్యుడిషియల్‌ రిమాండ్‌ విధించింది. ఈ హత్య కేసులో బిట్టుశ్రీను నిందితులకు మరణాయుధాలు, వాహనం సమకూర్చాడని అభియోగాలున్నాయి. 
రాష్ట్ర హైకోర్టు న్యాయవాదులుగా పనిచేస్తున్న మంథనికి చెందిన  వామన్‌రావు-నాగమణి దంపతులు ఫిబ్రవరి 17న పెద్దపల్లి జిల్లాలో దారుణహత్యకు గురయ్యారు. కారులో హైదరాబాద్‌ వస్తుండగా పెద్దపల్లి జిల్లా రామగిరి మండలం కల్వచర్ల వద్ద కుంట శ్రీను ఇతరులతో కలిసి ఈ హత్యకు పాల్పడ్డాడని పోలీసులు కేసు నమోదు చేశారు.