Andhra news: పరవాడ ఫార్మాసిటీలో అగ్ని ప్రమాదం.. నలుగురి మృతి

పరవాడ: అనకాపల్లి జిల్లా పరవాడ జవహర్‌లాల్ నెహ్రూ ఫార్మాసిటీలోని లారస్‌ ల్యాబ్స్‌ యూనిట్‌ 3 కర్మాగారంలో అగ్నిప్రమాదం సంభవించింది. సంస్థలోని మ్యానుఫాక్చరింగ్‌ నంబర్‌ 6 బ్లాక్‌లోని గ్రౌండ్‌ ఫ్లోర్‌లో రియాక్టర్‌కు చెందిన డ్రైయర్‌ రూమ్‌ నుంచి కెమికల్ ప్లాస్‌ ఫైర్‌ అవ్వడంతో అగ్నిప్రమాదం సంభవించింది. అగ్ని కీలలు రబ్బరు పరికరాలకు అంటుకొని గ్రౌండ్‌ ఫ్లోర్‌ అంతా మంటలు వ్యాపించాయి. అక్కడ విధులు నిర్వహిస్తున్న ఖమ్మం జిల్లాకు చెందిన కెమిస్ట్‌ బంగి రాంబాబు(32), గుంటూరుకు చెందిన ఎగ్జిక్యూటివ్‌ తలసిల రాజేశ్‌బాబు (36), అనకాపల్లి జిల్లా కె.కోటపాడుకు చెందిన హెల్పర్‌ రాపేటి రామకృష్ణ, అనకాపల్లి జిల్లి చోడవరానికి చెందిన హెల్పర్‌ మజ్జి వెంకట్రావు ప్రాణాలు కోల్పోయారు. ఈ ఘటనలో తీవ్రంగా గాయపడిన విజయనగరం జిల్లా నెల్లిమర్లకు చెందిన ఎగ్జిక్యూటివ్‌ ఎడ్ల సతీష్‌ పరిస్థితి విషమంగా ఉన్నట్లు వైద్యులు వెల్లడించారు.