సంవత్సరానికి కాదు.. జీవితానికే చివరి సెల్ఫీ

 టిక్‌టాక్‌లో చివరి మాటలే నిజమయ్యాయి..
 రోడ్డు ప్రమాదంలో యువకుడి మృతి

విజయనగరం : ‘ఒరేయ్‌ బావా.. చూడు, ఇదే నా చివరి సెల్ఫీ.. ఈ సంవత్సరానికి ఇదే ఆఖరు రోజు కదా.. అందుకే ఇదే చివరది’ అంటూ సరదాగా చిత్రీకరించుకున్న టిక్‌టాక్‌ వీడియోలోని మాటలు నిజమయ్యాయి. సంవత్సరానికే కాదు యువకుని జీవితానికే అది చివరి సెల్ఫీ అయింది. యాదృచ్ఛికమైన ఈ ఘటన ఆ కుటుంబంలో విషాదం నింపింది. విజయనగరం జిల్లా బొండపల్లి మండలం ఎం.కొత్తవలసకు చెందిన ఎం.వినోద్‌ గంట్యాడ మండలం పెదమజ్జిపాలెంకు చెందిన ఇద్దరు స్నేహితులతో కలిసి మంగళవారం రాత్రి వరకు ఆనందంగా గడిపాడు. ఈ సంవత్సరానికి ఇదే చివరి సెల్ఫీ అంటూ వీడియో చిత్రీకరించి పెట్టాడు. ఇది చిత్రీకరించిన కొద్ది గంటలకే ముగ్గురూ ద్విచక్ర వాహనంపై బయలుదేరారు. బొండపల్లి మండలం యడ్లపాలెం సమీపంలో అర్ధరాత్రి దాటాక తాటి చెట్టును ఢీకొట్టారు. ఈ ఘటనలో వినోద్‌ పక్కనే ఉన్న చెరువులో పడి చనిపోయాడు. మిగిలిన ఇద్దరు గాయపడ్డారు.