వేర్వేరు ఘటనల్లో 14మందికి అస్వస్థత

చెన్నై: విశాఖలో ఎల్జీ పాలిమర్స్‌ కంపెనీ నుంచి విషవాయువు లీకై 11మంది మృత్యువాత పడిన విషాద ఘటన జరిగిన కొన్ని గంటల వ్యవధిలోనే తమిళనాడు, ఛత్తీస్‌గఢ్‌లలో వేర్వేరు ఘటనలు వెలుగులోకి వచ్చాయి. తమిళనాడులోని కడలూర్‌ జిల్లాలో  నైవేలి లిగ్నైట్‌ కార్పొరేషన్‌లో బాయిలర్‌ పేలింది. ఈ ఘటనలో ఏడుగురికి గాయాలయ్యాయి. దీంతో దట్టమైన పొగలు కమ్ముకోవడంతో స్థానికులు భయాందోళనకు గురయ్యారు. సమాచారం అందుకున్న అధికారులు ఘటనా స్థలానికి చేరుకొని పరిశీలించారు. షార్ట్‌ సర్యూట్‌ వల్లే ఈ ప్రమాదం జరిగి ఉంటుందని పోలీసులు ప్రాథమికంగా భావిస్తున్నారు.

ఛత్తీస్‌గఢ్‌లో పేపర్‌మిల్లులో గ్యాస్‌ లీకై.. 
ఛత్తీస్‌గఢ్‌లోని రాయగఢ్‌లో మరో విషాదం వెలుగులోకి వచ్చింది. టెట్ల గ్రామంలోని  శక్తి పేపర్‌ మిల్లులో  విష వాయువు లీకైంది. బుధవారం సాయంత్రం ట్యాంక్‌ను శుభ్రం చేస్తున్న సమయంలో ఈ విషవాయువు ప్రభావానికి ఏడుగురు అస్వస్థతకు గురయ్యారు. లాక్‌డౌన్‌ కారణంగా మూసిఉన్న ఈ మిల్లులో పనులు పునఃప్రారంభించే ముందు శుభ్రపరిచే పనులు జరుగుతున్న క్రమంలో ఈ విషాదం జరిగినట్టు రాయగఢ్‌ ఎస్పీ వెల్లడించారు. అయితే, ఈ ఘటన గురించి పరిశ్రమ యాజమాన్యం సమాచారం ఇవ్వలేదని తెలిపారు. ఆస్పత్రి వర్గాలు పోలీసులకు సమాచారం ఇవ్వడంతో వెలుగులోకి వచ్చిందని పేర్కొన్నారు.  ఈ ఘటనలో ఏడుగురు అస్వస్థతకు గురికాగా.. ముగ్గురి పరిస్థితి విషమంగా ఉండటంతో వారిని రాయ్‌పూర్‌ ఆస్పత్రికి తరలించారు. దీనిపై దర్యాప్తు జరిపేందుకు ఫోరెన్సిక్‌ నిపుణుల బృందం ఘటనా స్థలానికి వెళ్లిందని తెలిపారు. ఈ ఘటనపై కేసు నమోదు చేయనున్నట్టు తెలిపారు.