కన్నపేగుపై కాఠిన్యం

నీటిడ్రమ్ములో పడేసి హతమార్చిన తల్లి

అప్పటివరకు అల్లారుముద్దుగా చూసుకున్న మగశిశువును ఆ తల్లి నీటి డ్రమ్ములో పడేసి హతమార్చింది. మానసిక స్థితి బాగోలేక మాతృత్వపు మమకారాన్ని మరిచి దారుణానికి పాల్పడిన ఉదంతం విశాఖ జిల్లా కశింకోట మండలం ఏఎస్‌పేట పంచాయతీ నర్సాపురంలో చోటుచేసుకుంది. గ్రామానికి చెందిన యాచలపు అప్పలరాజు దంపతులకు నెలన్నర పసిబాలుడు ఉన్నాడు. శుక్రవారం రాత్రి పదింటికి తల్లి తన కుమారుడికి పాలు పట్టింది. అనంతరం ముగ్గురూ పడుకున్నారు. అర్ధరాత్రి దాటాక కొడుకు కనిపించడం లేదంటూ తల్లి హడావుడి చేసింది. సమాచారం అందుకొని వచ్చిన పోలీసులు డ్రమ్ములో శిశువు మృతదేహాన్ని గుర్తించారు. కన్నబిడ్డను నీటి డ్రమ్ములో పడేసినట్లు విచారణలో తల్లి చెప్పిందని డీఎస్పీ సునీల్‌ తెలిపారు. తన మానసిక స్థితి బాగోలేక ఇలా చేసినట్లు నిందితురాలు పేర్కొందని వివరించారు. తన కుమారుడిని తన భార్య చంపిందని అప్పలరాజు ఇచ్చిన ఫిర్యాదు మేరకు పోలీసులు కేసు నమోదు చేశారు.

-న్యూస్‌టుడే అనకాపల్లి పట్టణం, కశింకోట.