Crime News: అదుపు తప్పొద్దంటే...అమ్మనే హతమార్చింది

సైదాపేట, న్యూస్‌టుడే: జీవితంలో దారి తప్పొద్దని హెచ్చరించిన పాపానికి కన్నతల్లినే కడతేర్చిందా కుమార్తె. పోలీసుల కథనం ప్రకారం... తమిళనాడులోని తూత్తుక్కుడి వన్నార్‌వీధికి చెందిన మునియలక్ష్మి (43) భర్త నుంచి విడిపోయి తన ముగ్గురు పిల్లలతో కలిసి జీవిస్తోంది. ఆమె కుమార్తె (17) ఎప్పుడూ స్థానిక యువకులతో మాట్లాడుతుండటంతో మునియలక్ష్మి మందలించింది. దారి తప్పొద్దని హెచ్చరించింది. ఈ నేపథ్యంలో తన తల్లిని ఎవరో హత్య చేసినట్లు బాలిక ఆదివారం పోలీసులకు ఫోన్‌ చేసి సమాచారమిచ్చింది. పోలీసులు వచ్చి మునియలక్ష్మి మృతదేహాన్ని పోస్టుమార్టానికి పంపారు. తల్లిని స్నేహితులతో కలిసి కుమార్తే హత్య చేసినట్లు దర్యాప్తులో తెలిసింది. ఇంట్లో నిద్రిస్తున్న తల్లిని తన స్నేహితులైన యువకులతో కలిసి గొంతు నులిమి చంపినట్లు బాలిక విచారణలో పోలీసులకు చెప్పింది.