ఆకస్మిక వరదతో 8 మంది మృతి

పశ్చిమబెంగాల్లోని జల్పాయ్‌గుడిలో విషాదం

జల్పాయ్‌గుడి: దసరా రోజున పశ్చిమబెంగాల్‌లో తీవ్ర విషాదం చోటుచేసుకుంది. జల్పాయ్‌గుడిలోని మాల్‌ నదిలో బుధవారం రాత్రి దుర్గాదేవి విగ్రహాన్ని నిమజ్జనం చేస్తుండగా ఒక్కసారిగా నదీ ప్రవాహం పెరగడంతో వరద ఉద్ధృతికి కొట్టుకుపోయి 8మంది దుర్మరణం పాలయ్యారని పోలీసులు వెల్లడించారు. 100 మందిని రక్షించగలిగినట్లు జిల్లా కలెక్టర్‌ తెలిపారు. ఆ సమయంలో 500 మంది వరకు ప్రజలు నది వద్ద ఉన్నట్లు చెప్పారు. బుధవారం రాజస్థాన్‌లోని అజ్మీర్‌ జిల్లాలో దుర్గాదేవి విగ్రహాన్ని నిమజ్జనం చేసే సమయంలో నీటిలో మునిగి ఆరుగురు గల్లంతయ్యారు. వారిలో అయిదుగురి మృతదేహాలు లభ్యమయ్యాయి.