కొండయ్య.. లెక్కే వేరు

ఆర్వోకు నామపత్రాలు అందజేస్తున్న కొండయ్య

ఉదయగిరి, న్యూస్‌టుడే : ఎమ్మెల్యే అభ్యర్థులుగా పోటీ చేసేవారిలో ఎక్కువ మంది రాజకీయ, ఆర్థిక, సామాజిక బలాలున్న వారే ఉంటున్నారు. కొందరు పార్టీల తరఫున ఇంకొందరు ప్రధాన పార్టీల అభ్యర్థులకు అనుకూలంగా వ్యవహరించటానికి స్వతంత్ర అభ్యర్థులుగా నామినేషన్లు వేయటం సాధారణం. ఎలాంటి ఉద్దేశం లేకుండా ఎమ్మెల్యేగా నామినేషన్‌ వేయాలనే ఉత్సాహంతో అతి సామాన్యుడైన లెక్కల కొండయ్య (73) అనే వృద్ధుడు  ఉదయగిరి నియోజకవర్గ స్వతంత్ర ఎమ్మెల్యే అభ్యర్థిగా గురువారం నామినేషన్‌ దాఖలు చేశారు. ఇదే నియోజకవర్గం వింజమూరు మండలం నల్లగొండ్ల గ్రామానికి చెందిన లెక్కల కొండయ్య ఎమ్మెల్యేగా అభ్యర్థిగా నామినేషన్‌ వేయటం స్థానికులకు ఆసక్తి కలిగించింది. నాలుగవ తరగతి వరకు చదివిన ఈయన మండల కేంద్రాల్లో మైక్‌ పట్టుకొని రెవెన్యూ సమస్యలపై స్థానికులకు అవగాహన కల్పిస్తూ ఉంటారు. ఆర్వో కార్యాలయాన్ని సంప్రదించి అవసరమైన పత్రాలు పొందుపరచి నామినేషన్‌ దాఖలు చేశారు. కొండయ్యకు రూ. 11 వేల చరాస్తి, రూ. 9 లక్షల విలువైన స్థిరాస్తి ఉన్నట్లు అఫిడవిట్‌లో పేర్కొన్నారు.