ప్రాణం తీసిన ఫేస్‌బుక్‌ పరిచయం

వివాహిత బలవన్మరణం

ఆళ్లగడ్డ, దొర్నిపాడు, న్యూస్‌టుడే: ఓ వివాహిత అనుమానాస్పదంగా బలవన్మరణానికి పాల్పడిన ఘటన నంద్యాల జిల్లా దొర్నిపాడులో చోటుచేసుకుంది.  బాపట్ల జిల్లా నర్సయ్యపాలెం గ్రామానికి చెందిన భూషణానికి 52 ఏళ్లు, అతడికి 20 ఏళ్ల కుమారుడు, 18 ఏళ్ల కుమార్తె ఉండగా, భార్యను వదిలేశాడు. అలాగే దొర్నిపాడుకు చెందిన హసీనా(25)కు ఇద్దరు పిల్లలున్నారు. భర్త మద్యానికి బానిస కావడంతో అతనికి దూరంగా ఉంటున్నారు. ఈ నేపథ్యంలో భూషణం, హసీనాలకు ఫేస్‌బుక్‌లో పరిచయం ఏర్పడింది. రెండేళ్లుగా ఫోన్లో మాట్లాడుకోవడంతోపాటు సందేశాలు పంపించుకుంటున్నారు. ఇటీవల భూషణం.. హసీనాను తన వద్దకు వచ్చేయాలని పిలవడంతో ఈ నెల 1న ఇంట్లో ఎవరికీ చెప్పకుండా ఏడేళ్ల కుమారుడితో కలిసి వెళ్లిపోయింది. ఈ ఘటనపై హసీనా తండ్రి దూదేకుల బాషా పోలీసులకు ఫిర్యాదు చేశారు. పోలీసులు గాలించి బాపట్లలోని నర్సయ్య పాలెంలో ఉన్న ఇద్దరిని అదుపులోకి తీసుకుని దొర్నిపాడుకు తీసుకువచ్చారు. ఎస్సై తిరుపాలు వారికి కౌన్సెలింగ్‌ ఇచ్చారు. 3వ తేదీ రాత్రి హసీనాను తండ్రికి అప్పగించి ఇంటికి పంపించారు. భూషణాన్ని సైతం పోలీసులు వదిలేయడంతో అతడు తిరిగి బాపట్లకు వెళ్లిపోయాడు. శుక్రవారం తహసీల్దార్‌ సమక్షంలో హసీనాను బైండోవర్‌ చేసేందుకు పోలీసులు సిద్ధమయ్యారు. అయితే ఆమె ఉదయం 6 గంటల సమయంలో తన మేనమామ ఇంట్లో ఫ్యానుకు ఉరేసుకుని బలవన్మరణానికి పాల్పడింది. ఆత్మహత్యకు కారణాలు తెలియలేదు. ఇద్దరూ వివాహితులై పిల్లలుండి ఫేస్‌బుక్‌లో పరిచయం ఏర్పడటం, అది కాస్తా ఒక ప్రాణం తీసుకోవడానికి కారణం కావడం బాధాకరమని స్థానికులు పేర్కొన్నారు.