వైకాపా నాయకుల వేధింపులు.. మహిళ ఆత్మహత్యాయత్నం

నందికొట్కూరు, న్యూస్‌టుడే: తమకు అన్ని అర్హతలు ఉన్నా ఎందుకు ఇంటి పట్టా ఇవ్వలేదని ప్రశ్నించిన ఓ మహిళను అధికార పార్టీ నాయకులు వేధింపులకు గురిచేశారు. దీంతో బాధితురాలు పురుగుల మందు తాగి ఆత్మహత్యకు యత్నించారు. నంద్యాల జిల్లా పగిడ్యాల మండలం ప్రాతకోటలో శుక్రవారం ఈ విషాద ఘటన చోటుచేసుకుంది. ప్రస్తుతం ఆమె కర్నూలు ప్రభుత్వ సర్వజన ఆసుపత్రిలో చికిత్స పొందుతున్నారు. బాధితురాలు, కుటుంబ సభ్యులు తెలిపిన వివరాల మేరకు... గ్రామంలో గత బుధవారం శాప్‌ ఛైర్మన్‌ బైరెడ్డి సిద్ధార్థరెడ్డి పేదలకు ఇళ్ల పట్టాలను పంపిణీ చేశారు. స్థానిక మహిళ మంగమ్మ అక్కడికి వెళ్లి తమకు అన్ని అర్హతలున్నా పట్టా ఎందుకు ఇవ్వలేదని సిద్ధార్థరెడ్డిని ప్రశ్నించారు. అక్కడే ఉన్న వైకాపా నాయకుడు రమేష్‌నాయుడు ఆమెను అడ్డుకున్నారు. మరో నాయకుడు రామ్‌ప్రసాద్‌ ఆమెపై పోలీసుస్టేషన్‌లో ఫిర్యాదు చేశారు. అప్పటి నుంచి పోలీసులు, వైకాపా నాయకులు తనపై రోజూ కక్ష సాధింపు చర్యలకు పాల్పడుతున్నారని మంగమ్మ వాపోయారు. వారి వేధింపులు భరించలేక పురుగుల మందు తాగినట్లు పేర్కొన్నారు. ఈ విషయమై ముచ్చుమర్రి ఎస్సై నాగార్జునను వివరణ కోరగా.. మంగమ్మపై ఫిర్యాదు అందడంతో విచారించేందుకు పిలిచామని, ఎలాంటి వేధింపులకు గురి చేయలేదని తెలిపారు.