అదర్‌ పూనావాలా ఫొటోతో మోసం.. రూ.కోటి కాజేసిన కేసులో ఏడుగురి అరెస్టు

పరారీలో ప్రధాన నిందితుడు

పుణె: మహారాష్ట్రలోని పుణెకు చెందిన ప్రముఖ వ్యాక్సిన్ల తయారీ సంస్థ సీరమ్‌ ఇన్‌స్టిట్యూట్‌ ఆఫ్‌ ఇండియా సీఈవో అదర్‌ పునావాలా ఫొటోతో మోసానికి పాల్పడిన ఏడుగురు వ్యక్తులను పోలీసులు అరెస్టు చేశారు. పునావాలా ఫొటోను వాట్సప్‌ డీపీగా పెట్టుకొని సీరమ్‌ సంస్థకు చెందిన ఓ డైరెక్టర్‌ సతీశ్‌ దేశ్‌పాండేతో నిందితుడు చాటింగ్‌ చేశాడని వారు తెలిపారు. డబ్బులు కావాలంటూ మెసేజ్‌లు పెట్టినట్లు పేర్కొన్నారు. అవి పునావాలా నుంచే వచ్చాయని నమ్మిన డైరెక్టర్‌ నిందితుడు వాట్సప్‌ చాటింగ్‌లో పేర్కొన్న ఎనిమిది బ్యాంకు ఖాతాల్లోకి రూ.1.01 కోట్లను బదిలీ చేశారన్నారు. ఆ ఖాతాదారుల్లో ఏడుగురిని వేర్వేరు రాష్ట్రాల్లో అరెస్టు చేయగా.. ఈ కేసులో ప్రధాన నిందితుడి కోసం గాలిస్తున్నట్టు డీసీపీ స్మార్థన పాటిల్‌ వెల్లడించారు. రూ.13 లక్షలు జప్తు చేశామన్నారు. నిందితులంతా బిహార్‌, యూపీ, మధ్యప్రదేశ్‌, ఆంధ్రప్రదేశ్‌కు చెందినవారని.. వీరంతా బీటెక్‌, బీఎస్సీ గ్రాడ్యుయేషన్‌ చదివారని డీసీపీ వివరించారు.