Hyderabad News: జూబ్లీహిల్స్‌ గ్యాంగ్‌ రేప్‌.. నలుగురు మైనర్లకు బెయిల్‌

హైదరాబాద్: జూబ్లీహిల్స్‌లో బాలికపై సామూహిక అత్యాచారం కేసులో నిందితులుగా ఉన్న నలుగురు మైనర్లకు బెయిల్‌ మంజూరైంది. జువైనల్‌ జస్టిస్‌ బోర్డు బెయిల్‌ మంజూరు చేసింది. సైదాబాద్‌లోని జువైనల్‌ హోమ్‌ నుంచి మంగళవారం ముగ్గురు బాలురు బెయిల్‌పై విడుదలయ్యారు. మరో బాలుడికి బెయిల్‌ మంజూరైనా కొన్ని కారణాల వల్ల ఆలస్యమైంది. నేడు హైకోర్టులో ఐదో బాలుడి బెయిల్ పిటిషన్‌ విచారణకు వచ్చే అవకాశం ఉంది. 

మే 28న జూబ్లీహిల్స్‌ రోడ్‌ నంబరు 36లోని అమ్నీషియా పబ్‌కు వచ్చిన బాలిక(17)ను కొందరు మైనర్లు ఇంటి వద్ద దించుతామని నమ్మించి కారులో తీసుకువెళ్లి అత్యాచారానికి పాల్పడిన ఘటన విదితమే. నిందితులైన సాదుద్దీన్‌ మాలిక్‌(19)తోపాటు మరో అయిదుగురు బాలురను అరెస్ట్‌ చేశారు. వీరిలో సాదుద్దీన్‌ చంచల్‌గూడ జైలులో శిక్షను అనుభవిస్తుండగా మిగిలిన బాలురను జువైనల్‌ హోంకి తరలించిన విషయం తెలిసిందే.