JK: శ్రీనగర్‌లో వేర్వేరు చోట్ల ఉగ్రవాదుల కాల్పులు.. ఒకరి మృతి

శ్రీనగర్‌: జమ్మూకశ్మీర్‌లోని శ్రీనగర్‌లో వేర్వేరు చోట్ల ఉగ్రవాదులు కాల్పులకు తెగబడ్డారు. ముష్కరుల దాడిలో ఒకరు మృతి చెందగా.. మరొకరికి గాయాలైనట్టు పోలీసులు వెల్లడించారు. కారానగర్‌ ప్రాంతంలో సాయంత్రం 5.50 గంటల ప్రాంతంలో ఉగ్రవాదులు కాల్పులు జరపగా.. ఈ ఘటనలో ఓ వ్యక్తి తీవ్రంగా గాయపడ్డారు. దీంతో చికిత్స నిమిత్తం ఆస్పత్రికి తరలించగా అప్పటికే అతడు మృతిచెందినట్టు వైద్యులు ధ్రువీకరించారు.  ఈ ఘటనతో రంగంలోకి దిగిన పోలీసులు ఆ ప్రాంతంలో గాలింపు చేపట్టారు. అదనపు బలగాలను శ్రీనగర్‌లోని అన్ని చోట్లా మోహరించారు. ముమ్మర తనిఖీలు చేపట్టారు.

ఈ తనిఖీలు కొనసాగుతుండగానే మరోవైపు, రాత్రి 8గంటల సమయంలో మరోచోట కాల్పులు చోటుచేసుకున్నాయి. ఈ కాల్పుల్లో మహమ్మద్‌ షఫీ దార్‌ అనే వ్యక్తి గాయపడినట్టు పోలీసులు తెలిపారు. అతడిని చికిత్స నిమిత్తం ఆస్పత్రికి తరలించినట్టు వెల్లడించారు. ఈ రెండు ఘటనలపై దర్యాప్తు చేస్తున్న పోలీసులు.. దాడికి పాల్పడిన వారి ఆచూకీ కోసం ముమ్మరంగా గాలిస్తున్నారు.