రాయదుర్గం సర్వతోముఖాభివృద్ధికి కృషి : కాలవ

ర్యాలీగా వెళ్తున్న కాలవ శ్రీనివాసులు, నాయకులు

రాయదుర్గం, న్యూస్‌టుడే: రాయదుర్గం సర్వతోముఖాభివృద్ధికి కృషి చేస్తానని తెదేపా ఎమ్మెల్యే అభ్యర్థి కాలవ శ్రీనివాసులు అన్నారు. బుధవారం మధ్యాహ్నం ఆయన నామినేషన్‌ దాఖలు చేశారు. ముందుగా అభయాంజనేయస్వామి, శ్రీప్రసన్నవేంకటేశ్వరస్వామి, జమ్మి చెట్టు బన్ని మహాంకాళి ఆలయాల్లో కుటుంబసభ్యులతో కలిసి పూజలు నిర్వహించారు. అనంతరం తెదేపా, భాజపా, జనసేన నాయకులు, కార్యకర్తలు, అనుబంధ సంఘాల నాయకులు, ప్రజాప్రతినిధులతో కాలవ శ్రీనివాసులు పట్టణంలో పెద్ద ఎత్తున ర్యాలీ నిర్వహించారు. పార్టీ జెండాలతో రాయదుర్గం పసుపుమయంగా మారింది. డప్పులు, వీరగాసుల నృత్యాలు, కీలు గుర్రాలు, కళాకారులు, నందికోళ్లు, తప్పెట్లతో ర్యాలీ ఆకట్టుకొంది. నామినేషన్‌ వేశాక కాలవ విలేకరులతో మాట్లాడారు. ఎన్నికల్లో తప్పక విజయం సాధిస్తామని ధీమా వ్యక్తం చేశారు. బీటీపీకి కృష్ణాజలాలు సాధిస్తానని, ఉంతకల్లు రిజర్వాయరు పనులు ప్రారంభించి పదేళ్లల్లో పూర్తి చేస్తామన్నారు. హెచ్చెల్సీ ఆధునీకీకరణ పనులు పూర్తి చేస్తానన్నారు. రాయదుర్గం బాలికల జూనియర్‌ కళాశాలను పూర్తి చేసి ప్రారంభిస్తానని, కణేకల్లులో డిగ్రీ కళాశాల ఏర్పాటు చేస్తామన్నారు. నిరుద్యోగులకు ఉపాధి అవకాశాలు కల్పిస్తామని హామీ ఇచ్చారు.