వైకాపా ఎమ్మెల్యే సోదరుడికి చేదు అనుభవం

ఇంటి మంజూరు పత్రాన్ని చూపుతున్న రామాంజినమ్మ
బుక్కపట్నం, న్యూస్‌టుడే : బుక్కపట్నం మండలంలోని బుచ్చయ్యగారిపల్లి గ్రామానికి చెందిన రామాంజినమ్మకు మూడేళ్ల కిందట జగనన్న గృహం మంజూరైంది. మంజూరు పత్రం సైతం అందించారు. గృహ నిర్మాణాన్ని మాత్రం చేసుకోనివ్వలేదు. పలుమార్లు అధికారులు, ప్రజాప్రతినిధుల చుట్టూ తిరిగినా ఫలితం లేకపోయింది. పుట్టపర్తి ఎమ్మెల్యే శ్రీధర్‌రెడ్డి సోదరుడు శ్రీనివాసరెడ్డి సోమవారం ఎన్నికల ప్రచారంలో భాగంగా బుచ్చయ్యగారిపల్లికి వెళ్లారు. వైకాపాకు ఓటు వేయాలని రామాంజినమ్మను అభ్యర్థించగా ఆమె మాట్లాడుతూ ‘మీ ప్రభుత్వంలో ఇల్లు మంజూరు చేశారు. నిర్మాణానికి మాత్రం వాలంటీరు అడ్డుపడ్డాడు. కనీసం పునాది కూడా వేసుకునేందుకు అనుమతివ్వలేదు. దీనిపై ఎమ్మెల్యే దుద్దుకుంట శ్రీధర్‌రెడ్డికి సైతం విన్నవించాం. పరిశీలిస్తామన్నారు తప్ప సమస్య తీర్చలేదు. ఎలా వేయాలి ఓటు’ అని ఆమె నిలదీసింది. స్థానిక నాయకులు జోక్యం చేసుకుని ఆన్‌లైన్‌లో ఉంటుందంటూ చెప్పగా మిమ్మల్ని కూడా అడిగాం. మీరు కూడా మాకు న్యాయం చేయలేదని ఆమె చెప్పడంతో అక్కడి నుంచి వెనుదిరిగారు.