వాలంటీరుకు దేహశుద్ధి

బొమ్మనహాళ్‌, న్యూస్‌టుడే: మండలంలోని ఓ గ్రామంలో మాజీ మహిళా వాలంటీరును సెల్‌ఫోన్‌లో వేధించిన మరో వాలంటీరుకు సోమవారం బంధువులు, గ్రామస్థులు దేహశుద్ధి చేశారు. గ్రామంలో ఏడుగురు వాలంటీర్లు ఉండగా అందులో ఐదుగురు రాజీనామా చేశారు. రాజీనామా చేసిన మహిళా వాలంటీరుకు ఓ వాలంటీరు సెల్‌ఫోన్‌లో వేధించేవాడు. గతంలో గ్రామస్థులు అతణ్ని మందలించి పంచాయితీ కూడా చేశారు. అయినా అతడు పద్ధతి మార్చుకోకుండా బాధ్యత రాహిత్యంగా వ్యవహరిస్తూ సెల్‌ఫోన్‌లో పోస్టులు పెట్టాడు. బాధితురాలి కుటుంబ సభ్యులు, బంధువులు ఆగ్రహం వ్యక్తం చేస్తూ సదరు వాలంటీరును చితకబాదారు. ఈవిషయంపై పోలీసులను విచారించగా తమకు ఎలాంటి ఫిర్యాదు అందలేదన్నారు.