పట్టుగూళ్ల కొరత.. మూతపడుతున్న రీలింగ్‌ కేంద్రాలు

తాత్కాలికంగా మూతపడిన రీలింగ్‌ కేంద్రం

మదనపల్లె(పట్టణం): పట్టుగూళ్ల ఉత్పత్తి తగ్గుముఖం పట్టడంతో రీలింగ్‌ కేంద్రాలు మూతపడుతున్నాయి. దీనిపై ఆధారపడిన రీలింగ్‌ కేంద్రాల యజమానులకు ఆర్థిక ఇబ్బందులు తప్పడం లేదు. పట్టుగూళ్ల ఉత్పత్తి తగ్గిపోవడంతో రీలర్లకు దొరకడం లేదు. మదనపల్లె పట్టుగూళ్ల విక్రయకేంద్రానికి గూళ్లు రోజుకు 200 కిలోలు లోపే వస్తున్నాయి. వారంలో రెండు మూడు రోజులు రావడం లేదు. రీలర్ల డిమాండ్‌కు తగ్గట్టుగా గూళ్లు లభించకపోవడంతో వారు బయటప్రాంతాలకు తరలివెళుతున్నారు. మదనపల్లెలో 35 వరకు రీలింగ్‌ కేంద్రాలు ఉన్నాయి. ఇందులో 500 మందికిపైగా పనిచేస్తున్నారు. ప్రస్తుతం పట్టుగూళ్ల కొరత కారణంగా 15 కేంద్రాలు మూతపడినట్లు తెలిసింది. ఒకరిద్దరైతే రీలింగ్‌ కేంద్రాన్ని పూర్తిగా మూసివేసి చికెన్‌సెంటర్‌ నిర్వహిస్తున్నట్లు సమాచారం. పనిచేస్తున్న రీలింగ్‌కేంద్రాల నిర్వాహకులు మాత్రం బయటప్రాంతాలకు వెళ్లి పట్గుగూళ్లను కొనుగోలు చేస్తున్నారు. ఇలా చేయడం వల్ల వారికి అదనంగా ఆర్థిక భారం పడుతోంది. పలమనేరు, కుప్పం నుంచి పట్టుగూళ్లను కొనుగోలు చేస్తున్నారు.