రాష్ట్రపతి పర్యటన షెడ్యూల్‌ విడుదల

శ్రీవారి ఆలయం ఎదుట భద్రతా ఏర్పాట్లు పరిశీలిస్తున్న కలెక్టర్‌, జేసీ, ఎస్పీ తదితరులు

తిరుపతి (నగరం, నేరవార్తలు), తిరుమల: రాష్ట్రపతి ద్రౌపది ముర్ము రెండు రోజుల పర్యటన నిమిత్తం ఆదివారం తిరుపతి పర్యటన వివరాలను కలెక్టర్‌ కె.వెంకటరమణారెడ్డి వెల్లడించారు. ఆదివారం రాత్రి 9.25 గంటలకు రేణిగుంట విమానాశ్రయం చేరుకుంటారు. ఆపై రోడ్డు మార్గాన తిరుమల చేరుకుని పద్మావతి అతిథిగృహంలో బస చేస్తారు. సోమవారం ఉదయం 9.25 గంటలకు వరాహస్వామివారిని, ఆపై శ్రీవారిని దర్శించుకుంటారు. 11.35 గంటలకు అలిపిరి గోమందిరం చేరుకుని అక్కడి కార్యక్రమాల్లో పాల్గొంటారు. 11.55 గంటలకు శ్రీపద్మావతీ మహిళా విశ్వవిద్యాలయంలో జరిగే కార్యక్రమాలకు హాజరవుతారు. మధ్యాహ్నం ఒంటి గంటకు తిరుచానూరు అమ్మవారిని దర్శించుకుంటారు. మధ్యాహ్నం 1.40 గంటలకు రేణిగుంట విమానాశ్రయం నుంచి దిల్లీకి తిరుగు ప్రయాణం కానున్నారు. ః రాష్ట్రపతి పర్యటన నేపథ్యంలో పటిష్ఠ భద్రతా ఏర్పాట్లు చేపట్టినట్లు కలెక్టరు వెంకటరమణారెడ్డి, ఎస్పీ పరమేశ్వరరెడ్డి పేర్కొన్నారు. రాష్ట్రపతి పర్యటన మార్గాల్లో శుక్రవారం భద్రతను పరిశీలించారు. రేణిగుంట విమానాశ్రయంలో ఉన్నతాధికారులతో ఏర్పాట్లపై సమీక్షించారు.