అనిశా వలలో సచివాలయ సర్వేయరు

పట్టుబడిన నాగేశ్వరరావు

పెద్దాపురం, న్యూస్‌టుడే: పెద్దాపురం మండలం కాండ్రకోట గ్రామ సచివాలయంలో సర్వేయరుగా పని చేస్తున్న పి. నాగేశ్వరరావు శుక్రవారం రూ. 10 వేలు లంచం తీసుకుంటూ అవినీతి నిరోధకశాఖ అధికారులకు చిక్కారు. అనిశా డీఎస్పీ సీహెచ్‌. సౌజన్య విలేకరుకు వెల్లడించిన వివరాల ప్రకారం.. కాకినాడకు చెందిన నూకరాజుకు కాండ్రకోటలో 10 ఎకరాల 2 సెంట్లు భూమి ఉంది. ఇందులో వైఎస్సార్‌ జగనన్న సర్వే కింద కొలతలు తీసిన నాగేశ్వరరావు దస్త్రాల్లో చూపిన దానికంటే 11 సెంట్లు తక్కువ వస్తుందని, తనకు రూ. 10 వేలు ఇస్తే మళ్లీ  సర్వే చేసి 4 సెంట్లు భూమి దస్త్రాల్లో నమోదు చేస్తానన్నారు. సర్వే చేసి 10 ఎకరాల 6 సెంట్లు నమోదు చేశారు. తర్వాత తనకు ఇస్తానన్న మొత్తం ఇవ్వాలని అడిగారు. దీనిపై రైతు 14400 నంబరుకి ఫోన్‌ చేసి ఫిర్యాదు చేయడంతో సర్వేయరు నాగేశ్వరరావు లంచం తీసుకుంటుండగా వలపన్ని పట్టుకున్నామన్నారు. ఈ దాడిలో ఏసీబీ సీఐ సతీష్‌, వాసుకృష్ణ, పుల్లారావు, శ్రీనివాసు తదితరులు పాల్గొన్నారు.