రోడ్డు ప్రమాదంలో బౌన్సర్‌ దుర్మరణం

అభిలాష్‌ (పాత చిత్రం)

కొవ్వూరు పట్టణం, చాగల్లు: రోడ్డు ప్రమాదంలో ఓ యువకుడు దుర్మరణం పాలైన ఘటన గురువారం జరిగింది. పోలీసుల వివరాల ప్రకారం.. చాగల్లు మండలం బ్రాహ్మణగూడేనికి చెందిన కోలాటి అభిలాష్‌ (29) రాజమహేంద్రవరంలో ఓ ప్రైవేటు సంస్థలో బౌన్సరు. విధులు ముగించుకుని ద్విచక్ర వాహనంపై తెల్లవారుజామున ఇంటికి వస్తున్నారు. రోడ్‌కం రైలు వంతెనపై అప్రోచ్‌ మార్గానికి చేరేసరికి వాహనం అదుపు తప్పి ఫుట్‌పాత్‌ను ఢీకొంది. తలకు తీవ్ర గాయాలై అక్కడికక్కడే మృతిచెందారు. మృతదేహాన్ని కొవ్వూరు ప్రభుత్వాసుపత్రికి తరలించారు. అభిలాష్‌ తండ్రి కాంతారావు ఫిర్యాదుపై పట్టణ ఎస్సై భూషణం అనుమానాస్పద మృతిగా కేసు నమోదు చేశారు. బుధవారం రాత్రి విధులు ముగించుకుని ఇంటికి వస్తున్నపుడు తండ్రి ఎన్నిసార్లు ఫోను చేసినా అతను ఎత్తలేదు. 4.30 గంటలు దాటాక ఎవరో ఫోను ఎత్తి చనిపోయిన సమాచారాన్ని ఇచ్చారు. అభిలాష్‌కు భార్య, ఏడాదిన్నర వయస్సున్న బాబు, అయిదు నెలల పాప ఉన్నారు. బ్రాహ్మణగూడెంలో విషాద ఛాయలు అలుముకున్నాయి.