సప్తగోదావరిని కాలుష్య రహితంగా తీర్చిదిద్దుతాం

ద్రాక్షారామ సప్తగోదావరి నదిలో పూడికతీత పనుల్లో పాల్గొన్న మంత్రి వేణుగోపాలకృష్ణ

ద్రాక్షారామ: ద్రాక్షారామ మాణిక్యాంబ సమేత భీమేశ్వరాలయం చెంతనున్న సప్తగోదావరి నదిని కాలుష్య రహితంగా తీర్చిదిద్దాలన్నది ప్రభుత్వ సంకల్పమని మంత్రి చెల్లుబోయిన శ్రీనివాస వేణుగోపాలకృష్ణ పేర్కొన్నారు. సప్తగోదావరి నదిలో ఉపాధి హామీ పథకం ద్వారా చేపట్టిన పూడిక తీత పనులను సోమవారం ఆయన పరిశీలించారు. ఈ సందర్భంగా కొంతసేపు కూలీలతోపాటు పలుగుతో మట్టి తవ్వి, గమేళాలకు ఎత్తారు. ఈ సందర్భంగా ఆయన మాట్లాడుతూ కేంద్ర పురావస్తు శాఖ అనుమతితో అనేక అభివృద్ధి పనులు చేపట్టడానికి ప్రణాళికలు సిద్ధం చేసినట్లు వివరించారు. భక్తులు శుద్ధమైన నీటిలో పుణ్యస్నానాలు ఆచరించేందుకు కోనేరును ప్రక్షాళన చేస్తున్నట్లు చెప్పారు. అంతకుముందు ఆయన స్వామి, అమ్మవార్లను దర్శించుకొని ప్రత్యేక పూజలు నిర్వహించారు. కార్యక్రమంలో సర్పంచి కొత్తపల్లి అరుణ, ఆలయ ఈవో తారకేశ్వరరావు, ప్రజాప్రతినిధులు పాల్గొన్నారు.